തൃശൂർ: സംസ്ഥാനത്തെ വിവിധ മേഖലകളിലുള്ള തൊഴിലാളികൾക്ക് മികവിന്റെ അടിസ്ഥാനത്തിൽ തൊഴിലാളി ശ്രേഷ്ഠ അവാർഡ് നൽകുന്നതിന് സർക്കാർ തീരുമാനിച്ചു. തൊഴിൽ രംഗത്തെ ഉത്പാദനക്ഷമതയും തൊഴിൽപരമായ കഴിവും പ്രോത്സാഹിപ്പിക്കുന്നതിന് ഈ അംഗീകാരം ഉപകരിക്കുമെന്നാണ് വിലയിരുത്തൽ. നിശ്ചിത മാനദണ്ഡങ്ങൾ അടിസ്ഥാനമാക്കിയാണ് മികച്ച തൊഴിലാളികളെ തെരഞ്ഞെടുക്കുന്നത്. തൊഴിൽ സംബന്ധമായ നൈപുണ്യം, അറിവ്, അച്ചടക്കം, കൃത്യനിഷ്ഠ, സഹപ്രവർത്തകരോടുള്ള പെരുമാറ്റം, ഉപഭോക്താക്കളോടുള്ള പെരുമാറ്റം, ക്ഷേമപദ്ധതികളോടുള്ള സമീപനം, കലാകായിക മേഖലയിലെ മികവ്, സാമൂഹിക പ്രവർത്തനത്തിലുള്ള പങ്കാളിത്തം, ശുചിത്വബോധം വിദ്യാഭ്യാസ യോഗ്യത, തൊഴിലിൽ നൂതനമായ ആശയങ്ങൾ കൊണ്ടുവരാനുള്ള താൽപ്പര്യം, കർത്തവ്യങ്ങൾ ഏറ്റെടുക്കാനുള്ള സദ്ധത, തൊഴിൽ നിയമങ്ങളിലുള്ള അവബോധം എന്നീ മാനദണ്ഡങ്ങൾ അനുസരിച്ചാണ് മികച്ച തൊഴിലാളിയെ കണ്ടെത്തുന്നത്.

സെക്യൂരിറ്റി ഗാർഡ്, ചുമട്ടു തൊഴിൽ, നിർമാണം, ചെത്ത്, മരംകയറ്റം, തയ്യൽ, കയർ, കശുവണ്ടി, മോട്ടോർ, തോട്ടം, സെയിൽസ്, നഴ്‌സ്, ഗാർഹിക ജോലി, ആഭരണനിർമാണം എന്നീ പതിമൂന്ന് തൊഴിൽ മേഖലകളിൽ നിന്നാണ് നിലവിൽ മികച്ച തൊഴിലാളിയെ കണ്ടെത്തുന്നത്.

മികച്ച തൊഴിലാളികളെ തെരഞ്ഞെടുക്കുന്നത് പരീക്ഷയിലൂടെ
വ്യത്യസ്ഥ മേഖലകളിൽ ഏറ്റവും മികച്ച പ്രവർത്തനം കാഴ്ചവെച്ച തൊഴിലാളികളെ ജില്ലാ, മേഖലാ, സംസ്ഥാന തലങ്ങളിലുള്ള അഭിമുഖ പരീക്ഷയിലൂടെയാണ് കണ്ടെത്തുന്നത്. മാനദണ്ഡങ്ങൾ പ്രകാരം ഒരു തൊഴിലാളിയോടൊപ്പം വിവിധ നിലകളിൽ സഹകരിച്ച് പ്രവർത്തിക്കുന്ന തൊഴിലാളി സംഘടനകളുടെയും തൊഴിലുടമയുടെയും അഭിപ്രായം കണക്കിലെടുക്കും. തൊഴിലാളി സ്വയം പൂരിപ്പിച്ച് സമർപ്പിക്കുന്ന ചോദ്യാവലിയുടെ മാർക്ക്, തൊഴിലുടമയും തൊഴിലാളി യൂണിയനുകളും പൂരിപ്പിച്ച് സമർപ്പിക്കുന്ന ചോദ്യാവലിയുടെ മാർക്ക് എന്നിവയ്‌ക്കൊപ്പം അസിസ്റ്റന്റ് ലേബർ ഓഫീസർമാർ അന്വേഷണം നടത്തി രേഖപ്പെടുത്തുന്ന മാർക്കും പരിഗണിച്ചാണ് മികച്ച തൊഴിലാളിയെ അഭിമുഖ പരീക്ഷയ്ക്കായി തെരഞ്ഞെടുക്കുന്നത്.