തൃശൂർ: ജില്ലയിലെ 7 മുൻസിപ്പാലിറ്റികളിലെ വൈസ് ചെയർമാൻ, തൃശൂർ കോർപറേഷനിലെ ഡെപ്യൂട്ടി മേയർ സ്ഥാനങ്ങളിലേക്കുള്ള തിരഞ്ഞെടുപ്പ് ഉച്ചകഴിഞ്ഞു 2ന് നടത്തും. ഓപ്പൺ ബാലറ്റ് വഴിയാണ് തിരഞ്ഞെടുപ്പ് നടക്കുന്നത്. വോട്ട് രേഖപ്പെടുത്തുന്ന അംഗം ബാലറ്റ് പേപ്പറിന്റെ പിന്നിൽ പേരും ഒപ്പും രേഖപ്പെടുത്തണം. ഏതെങ്കിലും സ്ഥാനത്തേക്ക് ഒരാൾ മാത്രമേ മത്സരിക്കുന്നുള്ളുവെങ്കിൽ തിരഞ്ഞെടുപ്പ് നടത്തില്ല. മത്സരിക്കുന്ന സ്ഥാനാർത്ഥികൾ രണ്ട് പേരെ ഉള്ളൂവെങ്കിൽ എറ്റവും അധികം സാധുവായ വോട്ടുകൾ നേടുന്ന ആളെ വിജയിയായി പ്രഖ്യാപിക്കും. സാധുവായ വോട്ടുകളുടെ എണ്ണം തുല്യമാണെങ്കിൽ യോഗത്തിൽ വെച്ച് തന്നെ നറുക്കെടുപ്പ് നടത്തി നറുക്കെടുക്കുന്ന ആളെ വിജയിയായി തീരുമാനിക്കും. രണ്ടിൽ അധികം സ്ഥാനാർത്ഥികൾ മത്സരിക്കുന്ന സാഹചര്യത്തിൽ മത്സരിക്കുന്ന ഏതെങ്കിലും ഒരു സ്ഥാനാർത്ഥി മറ്റെല്ലാ സ്ഥാനാർഥികൾക്കും കൂടി കിട്ടിയിട്ടുള്ളതിനേക്കാൾ കൂടുതൽ വോട്ടുകൾ നേടിയാൽ ആ ആളെ വിജയിയായി പ്രഖ്യാപിക്കും. മത്സരാർത്ഥികളിൽ ആർക്കും കൂടുതൽ വോട്ടുകൾ നേടാനായില്ലെങ്കിൽ ഏറ്റവും കുറവ് വോട്ടുകൾ നേടിയ സ്ഥാനാർത്ഥിയെ ഒഴിവാക്കി വീണ്ടും വോട്ടെടുപ്പ് നടത്തും. ഒഴിവാക്കപ്പെടേണ്ട സാഹചര്യത്തിൽ മത്സരാർത്ഥികൾ തുല്യ വോട്ടുകൾ നേടിയാൽ നറുക്കെടുപ്പ് നടത്തുകയും നറുക്കെടുക്കപ്പെട്ട ആളെ ഒഴിവാക്കുകയും ചെയ്യും. ഇത്തരത്തിൽ ഏതെങ്കിലും ഒരു സ്ഥാനാർത്ഥി കൂടുതൽ വോട്ട് നേടുന്ന വരെ തിരഞ്ഞെടുപ്പ് തുടരുകയും ചെയ്യും. സംവരണം ചെയ്തിട്ടുള്ള മുൻസിപ്പാലിറ്റികളിൽ തിരഞ്ഞെടുക്കപ്പെടുന്ന ആൾ സംവരണ മാനദണ്ഡങ്ങൾ പാലിച്ചിട്ടുണ്ടെന്ന് വരണാധികാരികൾ ഉറപ്പാക്കും. തിരഞ്ഞെടുപ്പ് തീയതിയിൽ വോട്ട് അവകാശമുള്ള അംഗങ്ങളുടെ പകുതി എങ്കിലും അംഗങ്ങൾ ഹാജരായില്ലെങ്കിൽ യോഗം തൊട്ടടുത്ത പ്രവർത്തി ദിവസത്തേക്ക് മാറ്റിവെക്കുകയും ആ യോഗത്തിൽ ക്വാറം നോക്കാതെ തിരഞ്ഞെടുപ്പ് നടത്തുകയും ചെയ്യും.