തൃശൂർ: വനിതാശിശു വികസനവകുപ്പ് വിദ്യാർത്ഥികൾക്ക് ഉന്നതവിദ്യാഭ്യാസത്തിന് ധനസഹായം നൽകുന്ന പടവുകൾ പദ്ധതിവഴി നാല് വിദ്യാർത്ഥികൾക്ക് ധനസഹായം നൽകും. വിധവകളുടെ മക്കൾക്ക് പ്രൊഫഷണൽ കോഴ്‌സുകൾ പഠിക്കാൻ വനിതാശിശു വികസനവകുപ്പ് നൽകുന്ന ധനസഹായ പദ്ധതിയാണ് പടവുകൾ. പദ്ധതി പുന:ക്രമീകരിച്ചതോടെ അംഗീകൃത കോളേജിൽ പഠിക്കുന്നവർക്കും സ്വാശ്രയ കോളേജുകളിൽ മെറിറ്റോടെ പഠിക്കുന്നവർക്കും ധനസഹായത്തിനായി അപേക്ഷിക്കാം. ബി.ടെക്, ബി.ഫാം, ബി എഡ് തുടങ്ങിയ പ്രൊഫഷണൽ കോഴ്‌സുകൾ പഠിക്കുന്ന നാല് വിദ്യാർത്ഥികളാണ് ഇത്തവണ ധനസഹായത്തിന് അപേക്ഷിച്ചത്. കളക്ടറേറ്റ് കോൺഫറൻസ് ഹാളിൽ ചേർന്ന കമ്മിറ്റിയിൽ എ.ഡി.എം റെജി.പി ജോസഫ്, വനിതാ ശിശുവികസന ഓഫീസർ എസ്.സുലക്ഷണ തുടങ്ങിയവർ പങ്കെടുത്തു.