തൃശൂർ: ജില്ലാ സ്‌പോർട്‌സ് കൗൺസിലിൽ ജനറൽബോഡി യോഗം തൃശൂർ വി.കെ.എൻ മേനോൻ ഇൻഡോർ സ്റ്റേഡിയത്തിൽ ചേർന്നു. കെ.യു അരുണൻ എം.എൽ.എ ഉദ്ഘാടനം ചെയ്തു. ജില്ലാ സ്‌പോർട്‌സ് കൗൺസിൽ പ്രസിഡന്റ് കെ.ആർ. സാംബശിവൻ അദ്ധ്യക്ഷനായി. 2019-20 വർഷത്തെ വരവ് ചെലവ് കണക്കുകൾ യോഗം അംഗീകരിച്ചു. സെക്രട്ടറി എം.വി. സൈമൺ റിപ്പോർട്ട് അവതരിപ്പിച്ചു. മൂന്ന് വർഷത്തോളം ജില്ലാ സ്‌പോർട്‌സ് കൗൺസിൽ സെക്രട്ടറി ആയിരുന്ന കെ.ആർ. സുരേഷിനെ യോഗം ആദരിച്ചു. സ്റ്റേറ്റ് സ്‌പോർട്‌സ് കൗൺസിൽ അംഗം ഡേവിസ് മൂക്കൻ, ജില്ലാ സ്‌പോർട്‌സ് കൗൺസിൽ ഭരണസമിതി അംഗങ്ങളായ ബേബി പൗലോസ്, കെ.എൽ. മഹേഷ്, ബാബു.എം.പാലിശ്ശേരി, ജില്ലാ സ്‌പോർട്‌സ് കൗൺസിൽ വൈസ് പ്രസിഡന്റ് ബിന്നി ഇമ്മട്ടി, എം.എം. ബാബു, ജോയ് വർഗീസ്.കെ തുടങ്ങിയവർ പങ്കെടുത്തു.