തൃശൂർ: ജില്ലാ പഞ്ചായത്തിന്റെ നേതൃസ്ഥാനത്തേക്ക് എത്തിയ രണ്ടുപേരും ത്രിതല പഞ്ചായത്ത് സംവിധാനത്തിൽ പ്രവർത്തിച്ചു ഏറെ പരിചയ സമ്പത്ത് നേടിയവരാണ്. മുൻ പൊയ്യ പഞ്ചായത്ത് പ്രസിഡന്റ്, മുൻ ജില്ലാ പഞ്ചായത്ത് പ്രതിപക്ഷ നേതാവ് എന്നി സ്ഥാനങ്ങൾ അലങ്കരിച്ചിട്ടുള്ള പി. കെ. ഡേവിസാണ് പ്രസിഡന്റ് സ്ഥാനത്തേക്ക് എത്തിയതെങ്കിൽ താന്ന്യം പഞ്ചായത്ത് മുൻ വൈസ് പ്രസിഡന്റ്, പ്രസിഡന്റ് എന്നി നിലകളിൽ പ്രവർത്തിച്ച പരിചയ സമ്പത്തുമായാണ് വൈസ് പ്രസിഡന്റ് സ്ഥാനത്തേക്ക് ഷീന പറയങ്ങാട്ടിൽ ചുമതലയേറ്റത്.

2010 - 2015 കാലയളവിലാണ് ജില്ലാ പഞ്ചായത്തിന്റെ പ്രതിപക്ഷ നേതാവായി പ്രവർത്തിച്ചത്. ഈ സമയത്ത് ജില്ലയിലെ ജനകീയ പ്രശ്‌നങ്ങൾ ഉയർത്തിക്കൊണ്ട് വരുന്നതിൽ ശ്രദ്ധേയമായ ഇടപെടലുകൾ നടത്തിയിട്ടുണ്ട്. കർഷകസംഘം ജില്ലാ സെക്രട്ടറിയും സി.പി.എം ജില്ലാ സെക്രട്ടേറിയറ്റ് അംഗവുമാണ്. സി.പി.എം ഏരിയാ സെക്രട്ടറിയായും പ്രവർത്തിച്ചിട്ടുണ്ട്. ജില്ലാ പഞ്ചായത്ത് പ്രസിഡന്റ് സ്ഥാനം സി.പി.എം ഏറ്റെടുത്തതോടെയാണ് പി.കെ. ഡേവിസിനു നറുക്ക് വീണത്. ആളൂർ ഡിവിഷനിൽ നിന്ന് യൂത്ത് കോൺഗ്രസ് ജില്ലാ പ്രസിഡന്റ് ജിനീഷിനെ 2600 ലേറെ വോട്ടുകൾക്ക് പരാജയപ്പെടുത്തിയാണ് ജില്ലാ പഞ്ചായത്തിൽ എത്തിയത്.

സി.പി.ഐ പ്രതിനിധിയായ ഷീന പറയങ്ങാട്ടിൽ പഞ്ചായത്ത് പ്രസിഡന്റെന്ന നിലയിൽ ശ്രദ്ധേയയായിരുന്നു. താന്ന്യം പഞ്ചായത്തിൽ പ്രസിഡന്റായിരിക്കെ ജനകീയാസൂത്രണ പദ്ധതിയിലൂടെ ഒട്ടേറെ വികസന പ്രവർത്തനങ്ങൾക്ക് നേതൃത്വം വഹിച്ചു. അമ്മാടം ജില്ലാ പഞ്ചായത്ത് ഡിവിഷനിൽ നിന്ന് ആദ്യമായാണ് ജില്ലാ പഞ്ചായത്തിലേക്ക് മത്സരിച്ചത്. കന്നി അങ്കത്തിൽ വിജയം നേടുകയും വൈസ് പ്രസിഡന്റ് സ്ഥാനത്ത് എത്തുകയെന്ന നേട്ടവും ഷീന കൈവരിച്ചു.