തിരുവനന്തപുരം: തൊഴിൽ മേഖലയുമായി ബന്ധപ്പെട്ട പരാതികൾ അറിയിക്കുന്നതിനായി ലേബർ കമ്മിഷണറേറ്റിലുള്ള കാൾ സെന്ററിൽ നവംബറിൽ ലഭിച്ച 93 പരാതികളിൽ 89 നും പരിഹാരമായി. തൊഴിൽ നിഷേധം സംബന്ധിച്ച നാല് പരാതികളിൽ ഒരെണ്ണവും കയറ്റിറക്ക് കൂലി തർക്കങ്ങളുമായി ബന്ധപ്പെട്ട് ലഭിച്ച രണ്ട് പരാതികളിൽ ഒരെണ്ണവും പരിഹരിച്ചു. മറ്റുള്ള 87 പരാതികളും കാൾ സെന്ററിൽ പരിഹരിച്ചു.
കയറ്റിറക്ക് കൂലി തർക്കങ്ങൾ, മിനിമം വേതനം നിഷേധിക്കൽ, തൊഴിൽ നിഷേധിക്കൽ, പ്രവൃത്തി പരിചയ സർട്ടിഫിക്കറ്റുകളുമായി ബന്ധപ്പെട്ട തർക്കങ്ങൾ, ഗ്രാറ്റുവിറ്റി പ്രശ്നങ്ങൾ, അവധി ദിനങ്ങൾ നിഷേധിക്കൽ തുടങ്ങി തൊഴിൽ മേഖലയുമായി ബന്ധപ്പെട്ട എല്ലാ പരാതികളും കാൾ സെന്ററിന്റെ 1800-4255-5214 (ടോൾ ഫ്രീ), 155214 (ബി.എസ്.എൻ.എൽ) എന്ന നമ്പറിൽ അറിയിക്കാം.
ആവാസ്, വേതന സുരക്ഷാ പദ്ധതി തുടങ്ങിയ പദ്ധതികളെക്കുറിച്ചുള്ള സംശയങ്ങൾക്കും മറുപടി ലഭിക്കും. രാവിലെ ഏഴു മുതൽ വൈകിട്ട് ഏഴു വരെയാണ് സെന്ററിന്റെ പ്രവർത്തനം. ഞായറാഴ്ച രാവിലെ എട്ടു മുതൽ വൈകിട്ട് അഞ്ചു വരെയും സേവനം ലഭിക്കും.