തിരുവനന്തപുരം: ബംഗാൾ ഉൾക്കടലിൽ രൂപംകൊണ്ട ബുറേവി ചുഴലിക്കാറ്റ് ഇന്ന് തിരുവനന്തപുരത്തെത്തുമെന്ന കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പിന്റെ പശ്ചാത്തലത്തിൽ ജില്ലയിൽ ദുരന്ത നിവാരണ മുന്നൊരുക്കങ്ങൾ പൂർത്തിയാക്കിയതായി മന്ത്രി കടകംപള്ളി സുരേന്ദ്രൻ പറഞ്ഞു. കാറ്റിന്റെ വേഗത കുറയുന്നതിനാൽ വലിയ നാശനഷ്ടം ബുറേവി കേരളത്തിൽ ഉണ്ടാക്കാനിടയില്ലെന്നു മന്ത്രി വാർത്താസമ്മേളനത്തിൽ പറഞ്ഞു. ക്യാമ്പുകളിൽ വൈദ്യുതിയും വെള്ളവും ഭക്ഷണ സാധനങ്ങളുമെത്തിക്കാൻ കെ.എസ്.ഇ.ബി, വാട്ടർ അതോറിട്ടി,സിവിൽ സപ്ലൈസ് വകുപ്പുകൾക്കു നിർദ്ദേശം നൽകിയിട്ടുണ്ടെന്നും മന്ത്രി പറഞ്ഞു. ചുഴലിക്കാറ്റിന്റെ പശ്ചാത്തലത്തിൽ മന്ത്രിയുടെ നേതൃത്വത്തിൽ ഇന്നലെ കളക്ടറേറ്റിൽ ഉന്നതതല യോഗം ചേർന്നു. കളക്ടർ ഡോ. നവ്‌ജ്യോത് ഖോസ, ജില്ലാ ഡെവലപ്‌മെന്റ് കമ്മിഷണർ വിനയ് ഗോയൽ, ദുരന്ത നിവാരണ വിഭാഗം ഡെപ്യൂട്ടി കളക്ടർ ഇ. മുഹമ്മദ് സഫീർ വിവിധ വകുപ്പുകളുടെ ജില്ലാ മേധാവികൾ തുടങ്ങിയവർ യോഗത്തിൽ പങ്കെടുത്തു.

24 മണിക്കൂർ കൺട്രോൾ റൂമുകൾ

1077 ആണ് കളക്ടറേറ്റിൽ പ്രവർത്തിക്കുന്ന ജില്ലാ കൺട്രോൾ റൂമിന്റെ നമ്പർ. താലൂക്ക് കൺട്രോൾ റൂമുകളുടെ നമ്പരുകൾ ഇങ്ങനെ: തിരുവനന്തപുരം 0471 2462006, നെയ്യാറ്റിൻകര 0471 2222227, കാട്ടാക്കട 0471 2291414, നെടുമങ്ങാട് 0472 2802424, വർക്കല 0470 2613222, ചിറയിൻകീഴ് 0470 2622406.