തിരുവനന്തപുരം: സംസ്ഥാനത്ത് രണ്ടു ദിവസം കൂടി ഒറ്റപ്പെട്ട നിലയിൽ ശക്തമായ മഴയ്ക്ക് സാധ്യത. രാമനാഥപുരത്തെ മാന്നാർ കടലിടുക്കിൽ തുടരുന്ന ന്യൂനമർദ്ദം ദുർബലമായതോടെ ബുറേവി ചുഴലിക്കാറ്റ് നാളെയോടെ അവിടെ തന്നെ അവസാനിക്കും. ന്യൂനമർദ്ദം നിർജ്ജീവമാകുന്നതുവരെ തെക്കൻ ജില്ലകളിൽ മഴ ലഭിക്കും. അറബിക്കടലിൽ കേരളത്തോട് ചേർന്ന് രൂപപ്പെട്ട ചക്രവാത ചുഴിയുടെ ഫലമായും മഴ ലഭിക്കാൻ സാധ്യതയുണ്ട്. ബംഗാൾ ഉൾക്കടലിൽ നിന്നുള്ള കിഴക്കൻ കാറ്റ് ശക്തമായതിനാലും ഇന്ന് ഇടിയോടു കൂടിയ മഴയ്ക്ക് സാധ്യതയുണ്ട്. എറണാകുളം ജില്ലയിൽ ഇന്ന് യെല്ലോ അലർട്ട് പ്രഖ്യാപിച്ചിട്ടുണ്ട്.

മത്സ്യബന്ധനത്തിനുള്ള വിലക്ക് തുടരും. ശക്തമായ തിരമാലകൾക്ക് സാധ്യതയുള്ളതിനാൽ തീരദേശവാസികൾ ജാഗ്രത പാലിക്കണം. ഇന്നലെ മദ്ധ്യ തെക്കൻ ജില്ലകളിലെ മലയോര പ്രദേശങ്ങളിൽ ശക്തമായ മഴ ലഭിച്ചു.