തിരുവനന്തപുരം: കൈറ്റ് വിക്ടേഴ്സിലൂടെയുള്ള ഫസ്റ്റ്ബെൽ ഡിജിറ്റൽ ക്ലാസിൽ 10, 12 ക്ലാസുകാർക്ക് ഇന്നലെ മുതൽ കൂടുതൽ ക്ലാസുകൾ സംപ്രേഷണം ചെയ്തുതുടങ്ങി. പൊതുപരീക്ഷ നടക്കുന്ന ക്ലാസുകളായതിനാലാണ് ഇവർക്ക് മുൻഗണന നൽകിയത്. ഇനി മുതൽ ദിവസവും പ്ലസ് ടുവിന് ഏഴ് ക്ലാസുകളും 10ന് അഞ്ച് ക്ലാസുകളുമുണ്ടാകും.

പ്ലസ് ടുവിന് നിലവിലുള്ള മൂന്ന് ക്ലാസുകൾക്ക് പുറമേ വൈകിട്ട് നാല് മുതൽ ആറ് വരെ നാലു ക്ലാസുകളാണ് അധികമായി സംപ്രേഷണം ചെയ്യുന്നത്. എന്നാൽ ഇത് വിവിധ വിഷയ ഗ്രൂപ്പുകളായതുകൊണ്ട് ഒരു കുട്ടിക്ക് പരമാവധി അഞ്ച് ക്ലാസിൽ കൂടുതൽ കാണേണ്ടി വരുന്നില്ല.

പത്താം ക്ലാസിന് രാവിലെ 9.30 മുതൽ 11 വരെയുള്ള മൂന്ന് ക്ലാസുകൾക്ക് പുറമേ വൈകിട്ട് മൂന്ന് മുതൽ നാല് വരെ രണ്ടു ക്ലാസുകൾ കൂടി അധികമായി സംപ്രേഷണം ചെയ്തുതുടങ്ങി. ശനി, ഞായർ ദിവസങ്ങളിലും പ്രത്യേകം ക്ലാസുകളുണ്ടാകും.

ജനുവരിയോടെ ഇരു ക്ലാസുകാർക്കും റിവിഷൻ ഉൾപ്പടെയുള്ള ‌ഡിജിറ്റൽ ക്ലാസുകൾ പൂർത്തിയാക്കാനാണ് വിദ്യാഭ്യാസവകുപ്പ് ലക്ഷ്യമിടുന്നത്. ഓരോ ദിവസത്തെ ടൈംടേബിളും, ക്ലാസുകളും www.firstbell.kite.kerala.gov.in ൽ ലഭ്യമാണ്