തിരുവനന്തപുരം: ജില്ലയിൽ ഇന്നലെ 254 പേർക്ക് കൂടി കൊവിഡ് സ്ഥിരീകരിച്ചു. 342 പേർ രോഗമുക്തരായി. നിലവിൽ 3,208 പേരാണ് രോഗം സ്ഥിരീകരിച്ച് ചികിത്സയിൽ കഴിയുന്നത്. ജില്ലയിൽ നാലുപേരുടെ മരണം കൊവിഡ് മൂലമാണെന്ന് സ്ഥിരീകരിച്ചു. വള്ളക്കടവ് സ്വദേശി മധുസൂദനൻ (63), കട്ടച്ചാൽകുഴി സ്വദേശി കുഞ്ഞുകൃഷ്ണൻ (75), നെല്ലിക്കുന്ന് സ്വദേശി കേശവൻ ആശാരി (82),ത ച്ചൻകോട് സ്വദേശിനി ജയ (60) എന്നിവരുടെ മരണമാണു കൊവിഡ് മൂലമാണെന്നു സ്ഥിരീകരിച്ചത്. ഇന്നലെ രോഗം സ്ഥിരീകരിച്ചവരിൽ 164 പേർക്കു സമ്പർക്കത്തിലൂടെയാണ് രോഗബാധയുണ്ടായത്. ഇതിൽ 3 പേർ ആരോഗ്യപ്രവർത്തകരാണ്. രോഗലക്ഷണങ്ങളെത്തുടർന്നു ജില്ലയിൽ 1,671 പേരെക്കൂടി നിരീക്ഷണത്തിലാക്കി. ഇവരടക്കം ആകെ 27,377 പേർ വീടുകളിലും 110 പേർ സ്ഥാപനങ്ങളിലും ക്വാറന്റൈനിൽ കഴിയുന്നുണ്ട്. ഇന്നലെവരെ നിരീക്ഷണത്തിലുണ്ടായിരുന്ന 2,125 പേർ രോഗലക്ഷണങ്ങളില്ലാതെ നിരീക്ഷണകാലം പൂർത്തിയാക്കി.