തിരുവനന്തപുരം: തദ്ദേശ തിരഞ്ഞെടുപ്പുമായി ബന്ധപ്പെട്ട് ജില്ലയിൽ സ്‌പെഷ്യൽ ബാലറ്റ് ഉൾപ്പടെ 28,643 പോസ്റ്റൽ ബാലറ്റുകൾ വിതരണം ചെയ്തതായി കളക്ടർ ഡോ. നവജ്യോത് ഖോസ അറിയിച്ചു. ഇതിൽ തിരഞ്ഞെടുപ്പ് ഡ്യൂട്ടിയിലുള്ള ഉദ്യോഗസ്ഥർക്കായി 15,570 പോസ്റ്റൽ ബാലറ്റുകൾ വിതരണം ചെയ്തു. കൊവിഡ് പോസിറ്റീവ്, ക്വാറന്റൈനിൽ കഴിയുന്നവർ എന്നിവർക്കായി സ്‌പെഷ്യൽ പോളിംഗ് ഓഫീസർ, തപാൽ മുഖേന 6,576 ബാലറ്റുകളാണ് വിതരണം ചെയ്തത്. നാല് മുനിസിപ്പാലിറ്റികളിലായി 1,492 പോസ്റ്റൽ ബാലറ്റുകളും 683 സ്‌പെഷ്യൽ പോസ്റ്റൽ ബാലറ്റുകളും ഉൾപ്പെടെ 2,175 പോസ്റ്റൽ ബാലറ്റുകൾ നൽകി. തിരുവനന്തപുരം മുനിസിപ്പൽ കോർപറേഷനിൽ 2,601 പോസ്റ്റൽ ബാലറ്റുകളും 1,721 സ്‌പെഷ്യൽ പോസ്റ്റൽ ബാലറ്റുകളും ഉൾപ്പെടെ 4,322 പോസ്റ്റൽ ബാലറ്റുകൾ അയച്ചിട്ടുണ്ട്. നവംബർ 29 മുതൽ ഡിസംബർ 7 വരെ ജില്ലയിൽ 135 ടീമുകളായി സ്‌പെഷ്യൽ പോളിംഗ് ഉദ്യോഗസ്ഥർ മുഖേന 5,900 ബാലറ്റുകളും പോസ്റ്റൽ മുഖാന്തിരം 3,080 ബാലറ്റുകളും അയച്ചു. കൊവിഡ് പോസിറ്റീവായ 45 പേർ ഉൾപ്പടെ 146 സ്‌പെഷ്യൽ വോട്ടർമാർ ജില്ലയിൽ പോളിംഗ് ബൂത്തുകളിലെത്തി വോട്ട് രേഖപ്പെടുത്തിയതായും കളക്ടർ അറിയിച്ചു.