തിരുവനന്തപുരം: കെ.എസ്.ആർ.ടി.സിയുടെ രക്ഷാപാക്കേജിന്റെ ഭാഗമായി മുഖ്യമന്ത്രി ഒക്ടോബർ 26 ന് പ്രഖ്യാപിച്ച ഇടക്കാലാശ്വാസം അനുവദിച്ച് ഉത്തരവ് ഇറക്കിയതായി മന്ത്രി എ.കെ.ശശീന്ദ്രൻ അറിയിച്ചു. കെ.എസ്.ആർ.ടി.സിയിലെ 26819 ജീവനക്കാർക്കും ആനുകൂല്യം ലഭ്യമാകും. പ്രതിമാസം 1500 രൂപ നിരക്കിൽ നവംബർ 1 മുതലാണ് അനുവദിക്കുക. ഡിസംബർ മാസം മുതലുള്ള ശമ്പളത്തിൽ വിതരണം ചെയ്യും. കെ.എസ്.ആർ.ടി.സിയിൽ ശമ്പള പരിഷ്‌കരണം നടപ്പിലാക്കുന്നതുവരെ ഇത് നൽകും. തുടർന്ന് റഫറണ്ടത്തിന് ശേഷം ശമ്പള പരിഷ്‌കരണ ചർച്ചകൾ ആരംഭിക്കുമെന്നും മന്ത്രി അറിയിച്ചു.

ഇത്രയും പേർക്കായി അധികമായി നൽകുന്നതിന് 4. 22 കോടി രൂപയാണ് ഇപ്പോൾ നൽകുന്നത്. അത് കെ.എസ്.ആർ.ടി.സി ലാഭത്തിൽ ആകുന്നത് വരെ ശമ്പളത്തോടൊപ്പം സർക്കാർ തന്നെ നൽകുമെന്നും മന്ത്രി അറിയിച്ചു.