തിരുവനന്തപുരം:ഇൻസാറ്റ്,​ ജി - സാറ്റ് ഉപഗ്രഹങ്ങളുടെ തുടർച്ചയായി വാർത്താവിനിമയത്തിൽ വൻകുതിപ്പിനായി ഐ. എസ്. ആ. ഒയുടെ അത്യാധുനിക ഉപഗ്രഹമായ സി.എം.എസ് 01 ഇന്നലെ ബഹിരാകാശത്തെത്തി.

വൈകിട്ട് 3.41ന് ശ്രീഹരിക്കോട്ടയിലെ സതീഷ് ധവാൻ കേന്ദ്രത്തിലെ രണ്ടാം വിക്ഷേപണത്തറയിൽ നിന്ന് പി.എസ്.എൽ.വി സി - 50 റോക്കറ്റിൽ കുതിച്ച ഉപഗ്രഹം കൃത്യം 20.11മിനിറ്റിൽ 492.93കിലോമീറ്റർ മേലെയുള്ള ആദ്യപഥത്തിലെത്തി. സോളാർ പാനലുകൾ വിടർത്തിയ ഉപഗ്രഹത്തിന്റെ നിയന്ത്രണം ഐ.എസ്. ആർ.ഒയുടെ ബംഗളുരു കേന്ദ്രം ഏറ്റെടുത്തു. ഉപഗ്രഹത്തിലെ ഇന്ധനം ജ്വലിപ്പിച്ച് മൂന്ന് ദിവസം കൊണ്ട് 35,​000 കിലോമീറ്റർ ഉയരത്തിൽ 42,​500കിലോമീറ്റർ വരെ അകലത്തായുള്ള സ്ഥിരം ഭ്രമണപഥത്തിലേക്ക് മാറും.

2006ൽ വിക്ഷേപിച്ച ഇൻസാറ്റ് 3ബിയുടെ കാലാവധി 2011ൽ പൂർത്തിയായി. അതോടെ കൂടുതൽ മെച്ചപ്പെട്ട ജിസാറ്റ് 12 വിക്ഷേപിച്ചു. അതിന്റെ കാലാവധിയും തീർന്നതോടെയാണ് അത്യാധുനിക സി.എം.എസ്. 01വിക്ഷേപിച്ചത്.

സി.എം.എസ്. 01

@ഇന്ത്യയുടെ 42ാം വാർത്താ വിനിമയ ഉപഗ്രഹം

@1410 കിലോഗ്രാം ഭാരം

@ആയുസ് ഏഴ് വർഷം

@ഇന്ത്യ,​ ആൻഡമാൻ,നിക്കോബാർ, ലക്ഷദ്വീപ്,​ ഇന്ത്യൻ സമുദ്രമേഖല പരിധിയിൽ

@ദുരന്തനിവാരണം, ടെലിവിഷൻ സംപ്രേക്ഷണം, ടെലിമെഡിസിൻ, ടെലി എഡ്യൂക്കേഷൻ സേവനങ്ങൾ

@വാർത്താവിനിമയത്തിന് സി.ബാൻഡ് ട്രാൻസ്പോണ്ടറുകൾ

@ശ്രീഹരിക്കോട്ടയിലെ 77-ാമത്തെ വിക്ഷേപണം

@പി.എസ്.എൽ.വി.റോക്കറ്റിന്റെ 52 -ാം വിക്ഷേപണം

@കൊവിഡ് കാലത്തെ രണ്ടാമത്തെ ദൗത്യം.

@കഴിഞ്ഞമാസം ഇ.ഒ.എസ്. ഉപഗ്രഹം വിക്ഷേപിച്ചു

സ്റ്റാർട്ടപ്പിന്റെ ഉപഗ്രഹം

ബ്രസീലിന്റെ 700കിലോ ഭാരമുള്ള ഉപഗ്രഹം വിക്ഷേപിക്കുന്ന വാണിജ്യ ദൗത്യമാണ് അടുത്തത്. ഇതിനൊപ്പം ഇന്ത്യൻ സ്‌പെയ്സ് ടെക്നോളജി സ്റ്റാർട്ടപ്പായ പിക്സൽ നിർമ്മിച്ച ആനന്ദ് എന്ന് ഭൗമ നിരീക്ഷണ ഉപഗ്രഹവും സ്പെയ്സ്‌ കിഡ്സിന്റെ " സതീഷ് ",​ യൂണിവേഴ്സിറ്റി കൺസോർഷ്യത്തിന്റെ യൂണിവ്‌സാറ്റ് എന്നീ വാർത്താവിനിമയ ഉപഗ്രഹങ്ങളും വിക്ഷേപിക്കും. പി.എസ്. എൽ.വി.സി. 51 റോക്കറ്റിൽ ഫെബ്രുവരിയിലാണ് ഈ ദൗത്യമെന്ന് ഐ. എസ്. ആർ. ഒ ചെയർമാൻ ഡോ.കെ.ശിവൻ പറഞ്ഞു.