സോഷ്യൽ മീഡിയയിലെ താരമാണ് സമീറ റെഡ്ഡി. സൗന്ദര്യത്തെ കുറിച്ചുള്ള പരമ്പരാഗതമായ കാഴ്ചപ്പാടുകൾ പൊളിച്ചടുക്കുന്ന സമീറയുടെ പോസ്റ്റുകൾ എപ്പോഴും ആരാധകരുടെ കൈയ്യടി നേടാറുണ്ട്. “ഇതാണ് ഞാൻ,” എന്നു പറഞ്ഞുകൊണ്ട് നരച്ച മുടിയും മേയ്ക്കപ്പില്ലാത്ത മുഖവുമായി എത്തി സമീറ ആരാധകരെയും അമ്പരപ്പിച്ചിരുന്നു. കൊവിഡ്ക്കാലം വീടിനകത്ത് മക്കളുടെ കുസൃതികൾ കണ്ടും മക്കൾക്കൊപ്പം കളിച്ചും ചെലവഴിക്കുകയാണ് സമീറ റെഡ്ഡി.

ഇപ്പോഴിതാ, അമ്മായിയമ്മയ്ക്ക് ഒപ്പമുള്ള ഒരു രസകരമായ വീഡിയോയുമായി എത്തിയിരിക്കുകയാണ് സമീറ. ഒരേ ഡ്രസ് മാറിയണിഞ്ഞ് ചുവടുവയ്ക്കുകയാണ് ഇരുവരും. "എന്നെക്കാളും ഫ്രീക്കത്തിയല്ലേ എന്റെ സാസൂ..." എന്നാണ് സമീറ ചോദിക്കുന്നത്. ലോക്ക്ഡൗൺകാലത്തെ തന്റെ അമ്മജീവിതത്തിലെ രസകരമായ നിമിഷങ്ങൾ കോർത്തിണക്കി കൊണ്ടുള്ള ഒരു വീഡിയോയും അടുത്തിടെ സമീറ പങ്കുവച്ചിരിക്കുന്നത്. അമ്മ ഭക്ഷണം കഴിക്കുമ്പോഴും ഉറങ്ങുമ്പോഴുമെല്ലാം വികൃതിയൊപ്പിക്കുന്ന കുസൃതികുടുക്കകളെയും വീഡിയോയിൽ കാണാം. അടുത്തിടെ മകളുടെ ഒരു വീഡിയോ ആരാധകർക്കായി താരം പങ്കുവച്ചിരുന്നു. “ബേബി "പി.ടി ഉഷ ഫുൾ സ്പീഡിലാണ്, നിങ്ങൾക്കു കഴിയുമെങ്കിൽ പിടിക്കൂ,” എന്നാണ് വീഡിയോ പങ്കുവച്ചുകൊണ്ട് സമീറ കുറിക്കുന്നത്. മുട്ടിലിഴഞ്ഞ് വേഗത്തിൽ നീങ്ങുന്ന മകളെയും വീഡിയോയിൽ കാണാം.രണ്ടാമത്തെ മകളെ ഗർഭിണിയായിരിക്കുന്ന കാലത്ത് നടത്തിയ അണ്ടർവാട്ടർ ഫോട്ടോഷൂട്ടാണ് സമീറ റെഡ്ഡിയെ വീണ്ടും വാർത്തകളിൽ ശ്രദ്ധേയയാക്കിയത്. ചിത്രങ്ങളും കുടുംബവിശേഷങ്ങളുമൊക്കെ സമൂഹമാദ്ധ്യമങ്ങളിലൂടെ ആരാധകരുമായി പങ്കുവയ്ക്കാറുണ്ട് താരം.