തിരുവനന്തപുരം: കൊവിഡ് പശ്ചാത്തലത്തിൽ അടഞ്ഞുകിടക്കുന്ന അങ്കണവാടികളുടെ പ്രവർത്തനം പുനരാരംഭിക്കാൻ തീരുമാനിച്ചതായി മന്ത്രി കെ.കെ. ശൈലജ അറിയിച്ചു. എല്ലാ അങ്കണവാടി വർക്കർമാരും ഹെൽപ്പർമാരും തിങ്കളാഴ്ച മുതൽ രാവിലെ 9.30ന് അങ്കണവാടിയിൽ ഹാജരാകണം. അതേസമയം ക്ലാസുകൾ ഉടൻ ആരംഭിക്കില്ലെന്നും മന്ത്രി വ്യക്തമാക്കി. മാർച്ച് 10 മുതലാണ് മുഴുവൻ അങ്കണവാടി പ്രീ സ്‌കൂൾ കുട്ടികൾക്കും താത്കാലിക അവധി നൽകിയത്.

കൊവിഡ് പശ്ചാത്തലത്തിലും ഫീഡിംഗ് ടേക്ക് ഹോം റേഷൻ ആയി നൽകുക, സമ്പുഷ്ട കേരളം പദ്ധതിയുമായി ബന്ധപ്പെട്ട സർവേകൾ, ദൈനംദിന ഭവന സന്ദർശനങ്ങൾ മുതലായവ തടസം കൂടാതെ നടത്തണമെന്ന് നിർദ്ദേശിച്ചിരുന്നെങ്കിലും കൊവി‌ഡ് വ്യാപനം കാരണം പല പ്രവർത്തനങ്ങളും ഫലപ്രദമായി നടത്താനായില്ല. ഈ സാഹചര്യത്തിലാണ് അങ്കണവാടികളുടെ പ്രവർത്തനം കൊവിഡ് മാനദണ്ഡങ്ങൾ പാലിച്ച് പുനരാരംഭിക്കാൻ നിർദേശിച്ചതെന്ന് മന്ത്രി വ്യക്തമാക്കി.