തിരുവനന്തപുരം: കേന്ദ്ര സർക്കാരിന്റെ വിവാദ കാർഷിക ബില്ലുകൾക്കെതിരെ പ്രമേയം പാസ്സാക്കാൻ നിയമസഭയുടെ പ്രത്യേക സമ്മേളനം 23ന് വിളിച്ചു ചേർക്കുന്നതിന് ഗവർണറോട് ശുപാർശ ചെയ്യാൻ ഇന്ന് മന്ത്രിസഭായോഗം ചേരും.

കർഷകസമരത്തിന് അനുകൂല നിലപാടാണ് എൽ.ഡി.എഫിനും,യു.ഡി.എഫിനും.. നിയമസഭ സമ്മേളിച്ച് ഇക്കാര്യത്തിലുള്ള സംസ്ഥാനത്തിന്റെ വികാരം ഒറ്റക്കെട്ടായി പ്രകടിപ്പിക്കുകയാണ് ലക്ഷ്യം. കഴിഞ്ഞ ദിവസം മുഖ്യമന്ത്രി പ്രതിപക്ഷനേതാവുമായി ടെലഫോണിൽ ബന്ധപ്പെട്ട ശേഷമാണ് ബുധനാഴ്ച ചേരാനുള്ള തീരുമാനം. പ്രത്യേക അടിയന്തര സമ്മേളനമായതിനാൽ ഗവർണറോട് 15 ദിവസത്തെ മുൻകൂർ അനുമതി തേടേണ്ടതില്ല. 8ന് ചേരാനിരിക്കുന്ന സഭാ സമ്മേളനത്തിന് ഗവർണറുടെ അനുമതിയായിട്ടുമില്ല.ബുധനാഴ്ച ഒരു മണിക്കൂർ സഭ സമ്മേളിക്കാനാണ് ആലോചിക്കുന്നത്. രാവിലെ 9ന് ആരംഭിക്കും. എല്ലാ കക്ഷിനേതാക്കൾക്കും സംസാരിക്കാൻ അവസരമുണ്ടാകും.