തിരുവനന്തപുരം : ശ്രീപദ്മനാഭസ്വാമി ക്ഷേത്രത്തിൽ എത്തുന്ന ഭക്തർക്കായി കൊവിഡ് ടെസ്റ്റ് കേന്ദ്രം ഇന്നു മുതൽ പ്രവർത്തനം ആരംഭിക്കും.കേന്ദ്ര പൊതുമേഖലാ സ്ഥാപനമായ എച്ച്.എൽ.എൽ ലൈഫ് കെയറിന്റെ കീഴിലുള്ള ഹിന്ദ്ലാബ്സ്, ജില്ലാ ആരോഗ്യ വകുപ്പുമായി സഹകരിച്ചാണ് പരിശോധനാ കേന്ദ്രം ശ്രീപദ്മനാഭ സ്വാമി ക്ഷേത്രം കിഴക്കേ നടയിൽ സജ്ജമാക്കിയിരിക്കുന്നത്. രാവിലെ 9 മുതൽ വൈകിട്ട് 3 വരെയാണ് പ്രവർത്തനസമയം. ശ്രീപദ്മനാഭ സ്വാമി ക്ഷേത്രത്തിലെത്തുന്ന ഭക്തർക്കു പുറമേ കോവിഡ് ലക്ഷണങ്ങളുള്ള പൊതുജനങ്ങൾക്കും ഈ സൗകര്യം ഉപയോഗിക്കാം.വിദേശത്തേക്ക് പോകുന്നവർക്കും ശബരിമല ഭക്തർക്കും ഇവിടെ നിന്നുള്ള കൊവിഡ് ടെസ്റ്റ് ഫലം രേഖയായി ഉപയോഗിക്കാം.ടെസ്റ്റ് ചെയ്യാൻ എത്തുന്നവർ ആധാർ അല്ലെങ്കിൽ പാസ്‌പോർട്ട് തിരിച്ചറിയൽ രേഖയായി കൊണ്ടുവരണം.സർക്കാർ നിരക്കിനേക്കാൾ കുറഞ്ഞ ചെലവിലാണ് ടെസ്റ്റ് സൗകര്യം ഏർപ്പെടുത്തിയിരിക്കുന്നത്.ആന്റിജൻ ടെസ്റ്റിന് 600 രൂപയും ആർ.ടി.പി.സി.ആർ.ടെസ്റ്റിന് 2000 രൂപയുമാണ് നിരക്ക്.ആന്റിജൻ ടെസ്റ്റ് ഫലം ഒരു മണിക്കൂറിനകവും ആർ.ടി.പി.സി.ആർ ഫലം 24 മണിക്കൂറിനകവും ലഭ്യമാകും.