മുടപുരം: കിഴുവിലം ഗ്രാമ പഞ്ചായത്ത് ഓഫീസിൽ സ്ഥാപിച്ചിരിക്കുന്ന ജനറേറ്ററിന്റെ ഡി.ബി ഭാഗികമായി കത്തി നശിച്ചു. ഇന്നലെ രാവിലെ 11 മണിയോടെയാണ് തീ പിടിച്ചത്. തീപിടിത്തം ഓഫീസിൽ പരിഭ്രാന്തി പടർത്തി. ഉടൻ തന്നെ ഗ്രാമപഞ്ചായത്ത് അസിസ്റ്റന്റ് സെക്രട്ടറി ബെൻസിലാൽ, ഓഫീസ് അസിസ്റ്റന്റ് നാഫെൽ എന്നിവരുടെ നേതൃത്വത്തിൽ മറ്റ് ജീവനക്കാരുടെ സഹകരണത്തോടെ ഫയർ എക്സ്റ്റിൻ ഗ്യൂഷറുകൾ ഉപയോഗിച്ച് തീ അണച്ചു. ഡി.ബി യൂണിറ്റിൽ ഉണ്ടായ ഷോർട് സർക്യൂട്ടാണ് തീപിടിത്തത്തിന് കാരണമായതെന്ന് അറിയുന്നു. ഇക്കഴിഞ്ഞ ഒക്ടോബറിലാണ് 8 ലക്ഷം രൂപ ചെലവഴിച്ച് പുതിയ ജനറേറ്റർ സ്ഥാപിച്ചത്.