പോത്തൻകോട്: സംസ്ഥാനത്തെ ഏറ്റവും വലിയ എലിവേറ്റഡ് ഹൈവേയായ കഴക്കൂട്ടം എലിവേറ്റഡ് ഹൈവേ 2021 ഒക്ടോബറിൽ നാടിന് സമർപ്പിക്കും. ലോക്ക് ഡൗണിനെ തുടർന്ന് രണ്ട് മാസത്തോളം നിർമ്മാണം മുടങ്ങിയിരുന്നെങ്കിലും നിലവിൽ നിർമ്മാണം വേഗത്തിലായിട്ടുണ്ട്. 2019 ഫെബ്രുവരിയിലാണ് ടെക്നോപാർക്ക് ഫേസ് ത്രീ മുതൽ കഴക്കൂട്ടം സി.എസ്.ഐ മിഷൻ ആശുപത്രി വരെ 2.72 കിലോമീറ്റർ നീളത്തിൽ എലിവേറ്റഡ് ഹൈവേ നിർമ്മാണം ആരംഭിച്ചത്. ഐ.ടി നഗരത്തിലെ ഗതാഗതക്കുരുക്ക് പരിഹരികുക എന്ന ലക്ഷ്യത്തോടെയാണ് ദേശീയപാതയിൽ പദ്ധതി യാഥാർത്ഥ്യമാക്കുന്നത്. ആർ.ഡി.എസ് - സി.വി.സി.സി കമ്പനികൾക്കാണ് പദ്ധതിയുടെ നിർമ്മാണച്ചുമതല. 35 മീറ്റർ നീളത്തിലും 22 മീറ്റർ വീതിയിലും നിർമ്മിക്കുന്ന 60 സ്‌പാനുകളിൽ (തൂണുകളിൽ ) നാലുവരിപ്പാതയായാണ് ഹൈവേ നിർമ്മാണം. 45 മീറ്ററാണ് ഹൈവേയുടെയും താഴത്തെ റോഡിന്റെയും വീതി. ഫേസ് ത്രീ മുതൽ കഴക്കൂട്ടം ജംഗ്‌ഷൻ വരെയുള്ള 1.40 കിലോമീറ്റർ ഒന്നാംഘട്ടവും കഴക്കൂട്ടം ജംഗ്‌ഷൻ മുതൽ സി.എസ്.ഐ മിഷൻ ആശുപത്രി വരെയുള്ള 1.32 കിലോമീറ്റർ രണ്ടാം ഘട്ടവും എന്ന നിലയിലാണ് നിർമ്മിക്കുന്നത്. 24 മാസംകൊണ്ട് പദ്ധതി പൂർത്തിയാക്കണമെന്നായിരുന്നു കരാർ. ദേശീയപാത വികസനത്തിന്റെ ഭാഗമായി നാല് വർഷം മുമ്പ് നാട്പാക്കിന്റെ നേതൃത്വത്തിൽ നടത്തിയ പഠനത്തിലാണ് ടെക്നോപാർക്ക് മുതൽ കഴക്കൂട്ടം വരെ എലിവേറ്റഡ് ഹൈവേ നിർമ്മിക്കണമെന്ന ആശയം ഉയർന്നത്. പാത ഇരട്ടിപ്പിക്കലിൽ ഉൾപ്പെടാതിരുന്ന പദ്ധതി, കഴക്കൂട്ടം - മുക്കോല പാതയിരട്ടിപ്പിക്കലിന്റെ നിർമ്മാണ ഉദ്ഘാടന സമയത്ത് കേന്ദ്രമന്ത്രി നിതിൻ ഗഡ്കരിയാണ് പ്രഖ്യാപിച്ചത്.

ശ്രദ്ധനേടി കൂറ്റൻ ക്രെയിൻ

എലിവേറ്റഡ് ഹൈവേ നിർമ്മാണത്തിന്റെ ഭാഗമായി തുടക്കത്തിൽത്തന്നെ നിർമ്മാണ സ്ഥലത്ത് സ്ഥാപിച്ച റെയിൽ ക്രെയിനാണ് എല്ലാവരുടെയും ശ്രദ്ധനേടിയത്. നിലവിലെ റോഡിന്റെ ഇരുഭാഗത്തും ഒറ്റ റെയിൽപ്പാളം സ്ഥാപിച്ച് 50 ടൺ വീതം ശേഷിയുള്ള രണ്ട് പാർട്ടുള്ള ക്രെയിൻ കൂറ്റൻ ജനറേറ്ററുകളുടെ സഹായത്തോടെ റെയിൽ പാളത്തിൽ സഞ്ചരിച്ചാണ് 70 ടൺ വരുന്ന ഓരോ ഡക്ക് സ്ളാബും സ്‌പാനുകൾക്ക് മുകളിൽ സ്ഥാപിക്കുന്നത്. ഫേസ് ത്രീ മുതൽ ടെക്നോപാർക്ക് വരെ ക്രെയിനിന്റെ റെയിലുകൾ സ്ഥാപിച്ചിട്ടുണ്ട്. ജംഗ്‌ഷനിലോട്ട് റെയിൽ സ്ഥാപിക്കുന്ന ജോലികൾ ആരംഭിച്ചു. നിർമ്മാണത്തിനാവശ്യമായ ഭാരമുള്ളതെല്ലാം എത്തിക്കുന്നത് ഈ ക്രെയിനുകളുടെ സഹായത്തോടെയാണ്.

 ആകെ ചെലവ് 200 കോടി

 എലിവേറ്റഡ് ഹൈവേക്ക് ആകെ 79 തൂണുകൾ

 52 സ്പാനുകളുടെ നിർമ്മാണം പൂർത്തിയായി

 തൂണുകൾ തമ്മിലുള്ള അകലം 25 - 30 മീറ്റർ

 നാലുവരിപ്പാതയിലെ ഓരോ വരിയുടെയും വീതി 9.5 മീറ്റർ

സർവീസ് റോഡുപണിയും സജീവം

-----------------------------------------------------------

എലിവേറ്റഡ് ഹൈവേ നിർമ്മാണത്തോടൊപ്പം ജംഗ്ഷനിലെ സർവീസ് റോഡുപണിയും ഇരുവശത്തെ ഓടകളുടെ നിർമ്മാണവും പുരോഗമിക്കുകയാണ്. നിലവിൽ പൊടിശല്യവും മഴ പെയ്‌താൽ ചെളിക്കെട്ടും കാരണം യാത്രക്കാർ ബുദ്ധിമുട്ടുകയാണ്.