പേരാമ്പ്ര: കൊയിലാണ്ടി-വടകര താലൂക്കുകളെയും പേരാമ്പ്ര-കുറ്റ്യാടി നിയമസഭാ മണ്ഡലങ്ങളെയും ബന്ധിപ്പിക്കുന്ന ചേനായിക്കടവ് പാലം യാഥാർത്ഥ്യമാകുമെന്ന പ്രതീക്ഷയിലാണ് പ്രദേശവാസികൾ. 2016ൽ ചേനായികടവ് പാലം എൽ.ഡി.എഫ് പ്രകടനപത്രികയിൽ ഉൾപ്പെടുത്തിയതോടെയാണ് പ്രതീക്ഷ പകർന്നത്. മന്ത്രി ടി.പി രാമകൃഷ്ണന്റെ ഇടപെടലിന്റെ അടിസ്ഥാനത്തിൽ യു.എൽ.സി.സി. പുഴയിലെ പാറ പരിശോധന ഉൾപ്പെടെ ഇൻവെസ്റ്റിഗേഷൻ പൂർത്തിയാക്കി. പി.ഡബ്ല്യു.ഡിക്ക് സമർപ്പിച്ചു.
പി.ഡബ്ല്യു.ഡി. ഡിസൈൻ വിഭാഗം 2018 ഡിസംബറിൽ അന്തിമ ഡിസൈനിംഗ് പൂർത്തിയാക്കി. 129.40 മീറ്റർ നീളം വരുന്ന പാലത്തിന് 26 മീറ്റർ വീതം നീളമുള്ള 3 സ്പാനുകളും 25.70 മീറ്റർ വീതം നീളമുള്ള 2 സ്പാനുകളും ഉൾപ്പെടെ 5 സ്പാനുകളാണുള്ളത്. 7.5 മീറ്റർ ടാറിംഗും 1.5 മീറ്റർ വീതം ഫുട്പാത്തുകളും ഉൾപ്പെടെ 10.5 മീറ്ററാണ് പാലത്തിന്റെ വീതി. പേരാമ്പ്ര ഭാഗം 210 മീറ്ററും വേളം ഭാഗം 220 മീറ്ററും ഉൾപ്പെടെ 430 മീറ്ററാണ് അപ്രോച്ച് റോഡിന്റെ നീളം. 2019 ജനുവരിയിൽ 10.8 കോടിയുടെ എസ്റ്റിമേറ്റ് തയ്യാറാക്കി സർക്കാരിന് സമർപ്പിച്ചു.
തുടർന്ന് 2019ലെയും 2020ലെയും ബജറ്റുകളിൽ ചേനായികടവ് പാലത്തിന് ടോക്കൺ സംഖ്യ വകയിരുത്തി. സ്ഥലം ഫ്രീയായി ലഭിക്കുന്ന സ്ഥലങ്ങളിൽ പാലം ലഭിക്കുമെന്ന അധികൃതരുടെ അറിയിപ്പിനെ തുടർന്ന് ആക്ഷൻ കമ്മിറ്റി സ്ഥലമുടമകളുമായി സംസാരിക്കുകയും അവർ ഫ്രീയായി സ്ഥലം വിട്ടുതരാൻ തയ്യാറാവുകയും ചെയ്ത സാഹചര്യത്തിൽ പി.ഡബ്ല്യു.ഡി ഒൻപത് കോടി രൂപ എസ്റ്റിമേറ്റ് തയ്യാറാക്കി സർക്കാരിന് സമർപ്പിച്ചിരിക്കയാണ്.
എസ്റ്റിമേറ്റ് തുകയുടെ ഇരുപത് ശതമാനമെങ്കിലും ബജറ്റിൽ ഉൾപ്പെടുത്തിയാൽ വർക്ക് ടെണ്ടർ ചെയ്യാൻ കഴിയുമെന്നാണ് പ്രതീക്ഷ. കുറ്റ്യാടിപ്പുഴയ്ക്കു മുകളിൽ എടവരാട്‌ ചേനായി കടവിൽ പാലം പണിയുന്നത് പ്രദേശത്ത്കാരുടെ പതിറ്റാണ്ടുകളായുള്ള അഭിലാഷമാണ്.
കഴിഞ്ഞ 50 വർഷത്തിലധികമായി ഇരു പ്രദേശങ്ങൾ തമ്മിൽ ബന്ധപ്പെടുന്നത് കടത്ത് തോണി വഴിയാണ്. വേളം പുഴയോരം ഉൾപ്പെടെ പ്രദേശത്തെ ജനങ്ങൾക്ക് മഴക്കാലമായാൽ തൊട്ടടുത്ത പട്ടണമായ പേരാമ്പ്രയിലും ചേനായിലും ജില്ലാ ആസ്ഥാനമായ കോഴിക്കോടും എത്തിച്ചേരാൻ സ്‌കൂൾ, കോളേജ് വിദ്യാർത്ഥികൾക്കടക്കം തോണിയാത്ര മാത്രമാണ് ആശ്രയം.
ഇരുകരകളിലുമുള്ള വേളം-എടവരാട് പ്രദേശത്തുകാർക്ക് വാഹനം വഴി പരസ്പരം ബന്ധപ്പെടുന്നതിന് 12 കിലോമീറ്ററിലധികം സഞ്ചരിക്കണം.

വേളം പഞ്ചായത്തിലെ ജനങ്ങൾക്ക് പേരാമ്പ്രയിലും ജില്ലാ ആസ്ഥാനമായ കോഴിക്കോടും എത്തിച്ചേരാൻ പത്ത് കിലോമീറ്റർ ദൈർഘ്യം കുറവ് ലഭിക്കുന്ന ചേനായികടവ് പാലം യാഥാർത്ഥ്യമായാൽ വികസനത്തിൽ എടവരാട്‌ ചേനായിക്കും, വേളം പെരുവയലിനും വലിയനേട്ടമാകും.