മാവേലിക്കര: നഗരസഭാ ചെയർമാന്റെ കാറി​ന് ഡ്രൈവറെ നി​യമി​ക്കുന്നതി​ന് കൗൺ​സി​ൽ അംഗീകാരം ലഭി​ക്കാതി​രുന്നതി​നെത്തുടർന്ന് ചെയർമാൻ ഇന്നലെ ഓഫീസി​ലെത്തി​യത് സ്വന്തം സൈക്കി​ളി​ൽ.

കഴിഞ്ഞ ദിവസം നടന്ന കൗൺസിൽ യോഗത്തിൽ ബി.ജെ.പി, സി.പി.എം അംഗങ്ങൾ ഒന്നിച്ച് നിന്നതോടെ ചെയർമാന്റെ കാറിന് ഡ്രൈവറെ നിയമിക്കുന്നതിനുള്ള അജണ്ട പാസാക്കിയെടുക്കാൻ കഴിഞ്ഞില്ല.

തുടർന്ന് ചെയർമാൻ നിയമിച്ച അനു എന്ന താത്കാലിക ജീവനക്കാരന്റെ നിയമനത്തിന് അംഗീകാരം ലഭി​ച്ചി​ല്ല.

ഡ്രൈവറെ നൽകില്ലെങ്കിൽ വാഹനവും വേണ്ടെന്ന് വച്ച ചെയർമാൻ താക്കോൽ സെക്രട്ടറിക്ക് കൈമാറി​. ചൊവ്വാഴ്ച വൈകിട്ട് സുഹൃത്തിന്റെ സ്കൂട്ടറിന്റെ പിന്നിലിരുന്നാണ് വീട്ടിലേക്ക് പോയത്.

വീട്ടിലെത്തിയ ചെയർമാൻ തന്റെ സന്തതസഹചാരിയായിരുന്ന സൈക്കിൾ പൊടിതട്ടിവെച്ചു. ഇന്നലെ രാവിലെ നഗരസഭയിലേക്ക് ആവശ്യമായ ഫയലുകളും പേപ്പറുകളും അടങ്ങിയ ബാഗ് സൈക്കിളിന്റെ പിന്നിലെ കാരിയറിൽ എടുത്ത് വച്ച് നഗരസഭയിലേക്ക് ചവിട്ടി നീങ്ങി​യപ്പോൾ അതൊരു സൗമ്യമായ പ്രതി​ഷേധമായി​.

കൗൺ​സി​ലി​ൽ ആശയക്കുഴപ്പം

ആറ് വാഹനങ്ങളുള്ള നഗരസഭയിൽ രണ്ട് സ്ഥിരം ഡ്രൈവർമാരും 4 താത്കാലിക ഡ്രൈവർമാരുമാണ് ഉള്ളത്. ഇതിൽ ഒരാളിന്റെ ഒഴിവുണ്ടായിരുന്നു. എന്നാൽ കൗൺസിൽ യോഗത്തിൽ സെക്രട്ടറി 6 ഡ്രൈവർമാർ നിലവിലുണ്ടെന്ന് പറഞ്ഞത് ചെയർമാൻ നിയമിച്ച ഡ്രൈവറെയും കൂട്ടിയായിരുന്നു. അധികം ആളിനെ എടുക്കേണ്ടതില്ലെന്ന നിലപാട് ബി.ജെ.പി, സി.പി.എം അംഗങ്ങൾ സ്വീകരിച്ചപ്പോൾ സെക്രട്ടറി തിരുത്തിയതുമില്ല.

എന്നാൽ ഇപ്പോഴും ആറാമത്തെ ഡ്രൈവറുടെ ഒഴി​വ് നി​ലവി​ലുണ്ട്. ചെയർമാന് ഇനി​യും കൗൺ​സി​ൽ അംഗീകാരത്തോടെ ഡ്രൈവറെ നി​യമി​ക്കാവുന്നതേയുള്ളൂ. അധി​ക നി​യമത്തെയാണ് ബി​.ജെ.പി​, സി​.പി​.എം അംഗങ്ങൾ എതി​ർത്തത്.