ആലപ്പുഴ: തുറവൂർ പഞ്ചായത്തിലെ പടിഞ്ഞാറേ മനക്കോടം നിവാസികളുടെ ഏറെനാളത്തെ ആവശ്യമായ വാക്കയിൽ പാലത്തിന്റെ നിർമാണം പുരോഗമിക്കുന്നു. അരൂർ നിയോജകമണ്ഡലത്തിലെ പളളിത്തോടിനെയും ഇല്ലിക്കൽ മനക്കോടത്തെയും ബന്ധിപ്പിച്ചു പൊഴിച്ചാലിനു കുറുകെയാണ് ‌ ഈ പാലം നിർമിക്കുന്നത്. 2017-18 സാമ്പത്തിക വർഷത്തെ സംസ്ഥാന ബഡ്ജറ്റിൽ പ്രഖ്യാപിച്ച പദ്ധതിക്ക് 16.80 കോടി രൂപയുടെ ഭരണാനുമതിയാണ് ലഭിച്ചത്. ഇതിൽ 1.45 കോടി രൂപ ഭൂമി ഏറ്റെടുക്കലിനു വേണ്ടി മാത്രമാണ് മാറ്റിവെച്ചത്. ബോസ്ട്രിംഗ് ആർച്ച് എന്ന നവീന രീതിയിലാണ് പാലം രൂപകൽപന ചെയ്തിട്ടുള്ളത്.
ഒറ്റപ്പെട്ട് കിടക്കുന്ന പടിഞ്ഞാറെ മനക്കോടത്തെ വാക്കയിൽ കോളനിയെ മൂലേക്കളം, തുറവൂർ തുടങ്ങിയ പ്രദേശങ്ങളുമായി ബന്ധിപ്പിക്കുന്ന പാലം നിർമ്മിക്കണമെന്നത് ജനങ്ങളുടെ ദീർഘകാല ആവശ്യമാണ്. 2019 സെപ്തംബറിലാണ് പാലത്തിന്റെ പണി തുടങ്ങിയത്. മന്ത്രി ജി. സുധാകരനാണ് നിർമാണോദ്ഘാടനം നിർവഹിച്ചത്. പാലം യാഥാർത്ഥ്യമാകുന്നതോടെ ഇതുവഴി തുറവൂർ, കുത്തിയതോട്, എറണാകുളം ഭാഗത്തേക്ക് വാക്കയിൽ പ്രദേശവാസികൾക്ക് എളുപ്പത്തിൽ എത്താനാകും. പാലത്തിന്റെ പൈലിംഗ് ജോലികളും, പൈൽ ക്യാപ്പിങ്ങ് പ്രവൃത്തികളുമാണ് നിലവിൽ പൂർത്തിയായിട്ടുള്ളത്. മറ്റു പണികൾ പുരോഗമിക്കുന്നു.

വാക്കയിൽ പാലം

ആകെ ചിലവ് : 16.80കോടി

നീളം : 32 മീറ്റർ

ക്യാരേജ് വേ :7.50 മീറ്റർ

ഇരു വശങ്ങളിലും 1.5 മീറ്റർ വീതിയിൽ നടപ്പാതകൾ

ഇരുകരകളിലുമായി 70 മീറ്റർ നീളത്തിൽ അപ്രോച്ച് റോഡുകൾ

80 മീറ്റർ നീളത്തിൽ മൂന്ന് സർവ്വീസ് റോഡുകൾ

82 : പാലത്തിന്റെ അപ്രോച്ച് റോഡ് നിർമാണത്തിനായി തുറവൂർ തെക്ക് വില്ലേജിൽ നിന്നും 82 സെന്റ് വസ്തു ഏറ്റെടുക്കുന്നതിനുള്ള അനുമതിയും സർക്കാരിൽ നിന്ന് ലഭിച്ചു