ആലപ്പുഴ: ആലപ്പുഴ ജില്ല പഞ്ചായത്ത് ഹാളിൽ നടന്ന വനിതാ കമ്മീഷൻ പരാതി പരിഹാര അദാലത്തിൽ 18 പരാതികൾക്ക് പരിഹാരമായി . എട്ട് പരാതികൾ പൊലീസിന് കൈമാറുകയും മൂന്ന് പരാതികൾ കൗൺസിലിംഗിന് വിടുകയും ചെയ്തു. 75 കേസുകളാണ് പരിഗണിച്ചത്. ബാക്കിയുള്ള പരാതികൾ ഫെബ്രുവരിയിൽ നടക്കുന്ന അദാലത്തിൽ പരിഹരിക്കും. കമ്മീഷൻ അംഗങ്ങളായ എം.എസ് .താര, ഷാഹിദ കമാൽ, കമ്മീഷൻ സി.ഐ. സുരേഷ് കുമാർ, പാനൽ അഡ്വക്കേ​റ്റുമാർ തുടങ്ങിയവർ അദാലത്തിൽ പങ്കെടുത്തു.

കുട്ടികൾക്കെതിരെയുള്ള ചൂഷണങ്ങളുമായി ബദ്ധപ്പെട്ട പരാതികളും കമ്മീഷന് മുന്നിലെത്തി. കുട്ടികൾക്കെതിരെയുള്ള ചൂഷണങ്ങൾ തടയുന്നതിന്റെ ആദ്യപടിയായി രക്ഷിതാക്കൾ കുട്ടികളുടെ പ്രശ്നങ്ങൾ കേട്ട്, പരിഹരിക്കാൻ ശ്രമിക്കണമെന്ന് കമ്മീഷൻ അഭിപ്രായപ്പെട്ടു.