നഗരശില്പിയുടെ പേരിലുള്ള ആർട്ട് ഗാലറി നാടിന് സമർപ്പിച്ചു
ആലപ്പുഴ : കൊവിഡ് കാലത്ത് 117ദിനരാത്രങ്ങൾ കൊണ്ട് ചിത്രകലാദ്ധ്യാപനായ ജിനു ജോർജ് വരച്ച ചിത്രങ്ങൾ ഉൾക്കൊള്ളിച്ച് ആലപ്പുഴ എസ്.ഡി.വി ബോയ്‌സ് ഹയർസെക്കൻഡറി സ്‌കൂളിൽ വിദ്യാർത്ഥികൾക്കായി ഒരുക്കിയ ആർട്ട് ഗ്യാലറി മന്ത്രി തോമസ് ഐസക് നാടിനു സമർപ്പിച്ചു.
600 ചതുരശ്ര അടി വിസ്തൃതിയിൽ ഏഴ് അടി ഉയരത്തിലാണ് ആലപ്പുഴ നഗരം രൂപകല്പന ചെയ്ത രാജാകേശവദാസിന്റെ പേരിലുള്ള ആർട്ട് ഗാലറി . ആലപ്പുഴയുടെ തനത് ഭംഗി വിളിച്ചോതുന്ന 10ചിത്രങ്ങളും 28മഹത് വചനങ്ങളും ഗാലറിയിൽ സ്ഥാപിച്ചിട്ടുണ്ട്.
രാജാ കേശവദാസ്, ലൈറ്റ് ഹൗസ്, കടൽപ്പാലം, ഹൗസ് ബോട്ട്, ചക്രം ചവിട്ടൽ, പാടത്ത് ഞാറുനടീൽ, തൊണ്ട് ചകിരിയാക്കൽ, വള്ളംകളി തുടങ്ങിയ ചിത്രങ്ങൾ ഗാലറിയ്ക്ക് ആകർഷണമേകും. ഗാന്ധിജി, സ്വാമി വിവേകാനന്ദൻ, ഡോ.ആനിബസന്റ് , ഡോ.എ.പി.ജെ.അബ്ദുൾകലാം ഉൾപ്പെടെ 28പേരുടെ ചിത്രങ്ങളോടു കൂടിയ മഹത് വചനങ്ങളാണ് ഇവിടെ സ്ഥാപിച്ചിട്ടുള്ളത്. അക്രലിക് മീഡിയത്തിൽ ചുമരിലും ഇനാമലിൽ തുണികളിലുമാണ് എസ്.ഡി.വി ബോയ്‌സ് ഹയർസെക്കൻഡറി സ്‌കൂളിലെ ചിത്രകലാദ്ധ്യാപകനായ ജിനു ജോർജ് ചിത്രങ്ങൾ ഒരുക്കിയത്. മഹത് വചനങ്ങൾ തയ്യാറാക്കിയത് സ്കൂൾ മാനേജിംഗ് കമ്മിറ്റി അംഗം എ.ശിവസുബ്രഹ്മണ്യമാണ്.
115 വർഷത്തെ പാരമ്പര്യമുള്ള സ്‌കൂളിന്റെ മുൻവശത്താണ് ഗ്യാലറി. മദ്യം മയക്കുമരുന്ന് എന്നിവയിൽ നിന്ന് വിദ്യാർത്ഥികളെ ബോധവാൻമാരാക്കുകയാണ് ഗാലറി കൊണ്ട് ലക്ഷ്യമിട്ടിരിക്കുന്നത്. വൈകാതെ ഓൺലൈൻവഴി തന്റെ വെബ്സൈറ്റിലൂടെ ലോകത്തിന്റെവിവിധ ഭട്ടഗങ്ങളിലുള്ള വിദ്യാർത്ഥികൾക്ക് സൗജന്യമായി ചിത്രകല പഠിക്കാൻ അവസരമൊരുക്കുമെന്ന് ജിനു ജോർജ് പറഞ്ഞു. രണ്ട് ലക്ഷം രൂപയോളം ചെലവഴിച്ചാണ് ഗാലറിയിൽ ചിത്രങ്ങൾ ഒരുക്കിയത്.
ചടങ്ങിൽ നഗരസഭ സ്റ്റാൻഡിംഗ് കമ്മിറ്റി ചെയർമാൻ കെ.ബാബു അദ്ധ്യക്ഷത വഹിച്ചു. സ്കൂൾ മാനേജർ പ്രൊഫ. എസ്.രാമാനന്ദൻ, പ്രിൻസിപ്പൽ നന്ദിനിക്കുട്ടി, മാനേജിംഗ് കമ്മിറ്റി അംഗം എസ്.ശിവസുബ്രഹ്മണ്യൻ എന്നിവർ പങ്കെടുത്തു.