തെക്കേ ഏഷ്യൻ രാജ്യങ്ങളിൽ സുഗന്ധവ്യഞ്ജനങ്ങൾ ഉത്പാദിപ്പിക്കുന്നതിൽ പ്രധാന രാജ്യമാണ് ഇന്ത്യ. ഇന്ത്യയുടെ വിവിധ ഭാഗങ്ങളിലുള്ള വൈവിദ്ധ്യവും അനുകൂലമായ കാലാവസ്ഥയും ഇതിനു കൂടുതൽ അവസരമൊരുക്കുന്നുണ്ട്. നമ്മുടെ ഭക്ഷണവിഭവങ്ങളിൽ ഇവയ്‌ക്ക് വലിയ പ്രാധാന്യവുമുണ്ട്. സുഗന്ധവ്യഞ്ജനങ്ങൾ ഇന്ത്യൻ ഭക്ഷണവിഭവങ്ങളുടെ രുചിയിലും വ്യത്യസ്‌തതയിലും വളരെയധികം പങ്ക് വഹിക്കുന്നു. ഇത്തവണ അൽപ്പം സുഗന്ധവ്യജ്ഞന വിശേഷങ്ങളാണ്!
കുരുമുളകിനെ തഴയില്ല
കേരളീയരുടെ ഭക്ഷണശീലങ്ങളുമായും ഔഷധസേവകളുമായും ഏറെ ബന്ധപ്പെട്ടുകിടക്കുന്ന ഒന്നാണ് കുരുമുളക്. കുരുമുളകിന്റെ പ്രാധാന്യം ഭാരതീയർ വളരെ കാലം മുമ്പേ തിരിച്ചറിഞ്ഞിരുന്നു. വിദേശികളുടെ ആഗമനത്തോടെ ലോകമെമ്പാടും കുരുമുളകിനു പ്രാധാന്യമേറി. പെപ്പർ നൈഗ്രാം എന്ന ശാസ്ത്രനാമത്തിലറിയപ്പെടുന്ന കുരുമുളകിന്റെ സ്വദേശം കേരളമാണെന്നു കരുതപ്പെടുന്നു. പൗരാണിക കാലം മുതൽക്കു തന്നെ കുരുമുളകിനെ ഔഷധസേവയുടെ ഭാഗമായി ഉപയോഗിച്ചുവരുന്നുണ്ട്.
പ്രധാന ഔഷധഗുണങ്ങൾ
കുരുമുളക് ഭക്ഷണത്തിന്റെ ഭാഗമാക്കുന്നത് ആമാശയത്തിലടങ്ങിയിരിക്കുന്ന വിഷാംശത്തെ നിർവീര്യമാക്കും.
കഫക്കെട്ടിനുള്ള നല്ല ഔഷധമാണ് കുരുമുളക്. കുരുമുളക്, ചുക്ക്, തിപ്പലി ഇവ സമാസമം എടുത്ത് അതിന്റെ എട്ടിരട്ടി വെള്ളത്തിൽ കഷായമാക്കി നാലിൽ ഒന്നായി വറ്റിച്ച് 20 മില്ലീ ലിറ്റർ വീതം രാവിലെയും രാത്രിയിലും സേവിച്ചാൽ കഫക്കെട്ടും അതോടനുബന്ധിച്ചുള്ള പനിയും മാറികിട്ടും.
കുരുമുളക് കഷായത്തിൽ പഞ്ചസാര ചേർത്ത് കഴിച്ചാൽ ജലദോഷം ശമിക്കും.
തൊണ്ട സംബന്ധമായ എല്ലാ രോഗങ്ങൾക്കും കുരുമുളക് നല്ലതാണ്. തൊണ്ട വേദന, ശബ്‌ദമടപ്പ്, തൊണ്ടയിലെ നീര് എന്നിവ ശമിക്കുവാൻ കുരുമുളക് കഷായം ദിനവും മൂന്നുനാല് ആവർത്തി സേവിച്ചാൽ മതി.
ശരീരത്തിലുണ്ടാകുന്ന വിറയൽ ശമിക്കുവാൻ കുരുമുളക് കഷായം നല്ലതാണ്. പിരിമുറുക്കവും മാറിക്കിട്ടും.
കുരുമുളകും കൽക്കണ്ടവും ചേർത്ത് പല ആവർത്തി ചവച്ചാൽ ചുമ ശമിക്കും. കുരുമുളകും ചുക്കും ചേർത്ത് കഷായമാക്കി സേവിച്ചാലും ഇതേ ഫലം ലഭിക്കും.
പനി, ജലദോഷം, ശരീരവേദന എന്നിവയ്‌ക്ക് കുരുമുളക് ചേർത്തു തിളപ്പിച്ച വെള്ളം ചെറുചൂടുള്ള അവസ്ഥയിലാക്കിയശേഷം കുളിക്കുന്നതു നല്ലതാണ്.
കുരുമുളക്, വെളിച്ചെണ്ണയിൽ കാച്ചി ശരീരിത്തിൽ തേച്ച് തുടർച്ചയായി തടവിയാൽ പക്ഷവാതം, വിറവാതം എന്നിവയ്‌ക്ക് ശമനമുണ്ടാകും.
കുരുമുളകിന്റെ ഇല വെളിച്ചെണ്ണയിൽ കാച്ചി തേച്ചാൽ ചൊറി, ചിരങ്ങ് തുടങ്ങിയവ ശമിക്കും.
നീർതാഴ്‌ചയ്‌ക്ക് ഏറ്റവും മികച്ച ഔഷധമാണ് കുരുമുളക്. വെളിച്ചെണ്ണയിൽ കുരുമുളക് ചേർത്ത് കാച്ചി തലയിൽ തേച്ചശേഷം കുളിച്ചാൽ നീർതാഴ്‌ച പൂർണമായും ഭേദമാകും.
ഇംഗ്ലീഷിൽ ബ്ളാക്ക് പെപ്പർ എന്നറിയപ്പെടുന്ന കുരുമുളക് ശരീരത്തിന്റെ രോഗപ്രതിരോധശേഷി നിലനിറുത്തുവാൻ പര്യാപ്‌തമാണ്. ഭക്ഷണശീലത്തിൽ കുരുമുളക് മിതമായ തോതിൽ ഉൾപ്പെടുത്തുന്നത് ആരോഗ്യ സംരക്ഷണത്തിന് ഉപകരിക്കും.
ഇഞ്ചി വേണം
ഇഞ്ചി നല്ലൊരു നാട്ടുമരുന്നാണ്, പല രോഗങ്ങൾക്കും ഒറ്റമൂലിയായി ഉപയോഗിക്കുന്നുണ്ട് ഇഞ്ചി. ആന്റി ഓക്‌സെഡുകളുടെ കലവറയുമാണ്. ആരോഗ്യ സംരക്ഷണത്തിൽ വളരെ പ്രധാന്യമുള്ള ഇഞ്ചിയുടെ ചില ഗുണങ്ങൾ പരിചയപ്പെടാം. കഫക്കെട്ട്, ഛർദ്ദി എന്നിവയ്‌ക്ക് ഇഞ്ചിനീര് തേനിൽ ചാലിച്ച് ഉപയോഗിക്കുന്നത് നല്ല ഫലം തരുന്നതാണ്.
ചുക്ക് കട്ടൻകാപ്പിയിൽ ചേർത്ത് കുടിക്കുന്നത് ഉറക്കമില്ലായ്‌മയെ അകറ്റും.
ഇഞ്ചിയും വെളുത്തുള്ളിയും തേനും സമം ചേർത്ത് തലയിൽ തേക്കുന്നത് തലമുടിയുടെ തിളക്കം നിലനിർത്തുന്നതിനും താരൻ അകറ്റുന്നതിനും സഹായിക്കും.
കൃഷ്‌ണതുളസിയുടെ നീരും ഇഞ്ചി നീരും ഉള്ളിനീരും തേനും സമം ചേർത്ത് കഴിക്കുന്നത് കഫശല്യം ഇല്ലാതാക്കും.
അര ടീസ്‌പൂൺ ഇഞ്ചി കൊത്തിയരിഞ്ഞതും ഒരു വെളുത്തുള്ളി അല്ലി നന്നായി അരിഞ്ഞതും അരടീസ്‌പൂൺ നാരങ്ങ നീരിൽ ചേർത്ത് ആഹാരത്തിന് മുമ്പ് കഴിക്കുന്നത് കൊളസ്‌ട്രോൾ കുറയ്‌ക്കും.
ഇഞ്ചി, പിപ്പലി,കുരുമുളക് എന്നിവയുടെ മിശ്രിതം, കറുവപ്പട്ടയും ചേർത്ത് ചായയിൽ കലർത്തി കഴിക്കുന്നത് കൊളസസ്‌ട്രോളിനെ നിയന്ത്രിക്കും.
ഗ്രാമ്പുവിന്റെ ഔഷധ ഗുണങ്ങൾ
സുഗന്ധവിളയായി അറിയപ്പെടുന്ന ഗ്രാമ്പു ഒരു മികച്ച ഔഷധം കൂടിയാണ്. പാചകത്തിലെ ഒരു പ്രധാന ഘടകമായി നമ്മൾ പലപ്പോഴും ഗ്രാമ്പു ഉപയോഗിക്കുന്നുണ്ടെങ്കിലും അതിന്റെ ഔഷധ പ്രാധാന്യത്തെ പറ്റി ഓർക്കാറില്ല. ഗ്രാമ്പുവിന്റെ ഇല, മൊട്ട്, തൊലി, വേര് എന്നിവയെല്ലാം ഔഷധഗുണമുള്ളവയായി കാലകാലങ്ങളായി പരിഗണിക്കപ്പെടുന്നു. ( പ്രോട്ടീൻ, സ്റ്റാർച്ച്, കാൽസ്യം, അയഡിൻ തുടങ്ങിയവ വ്യത്യസ്‌ത അളവിൽ ഗ്രാമ്പുവിൽ അടങ്ങിയിട്ടുണ്ട്) ഗ്രാമ്പുവിന്റെ ഉണങ്ങിയ മൊട്ടിൽ നിന്നും എടുക്കുന്ന ഗ്രാമ്പു തൈലമാണ് ഏറെ ഔഷധപ്രദം.
അരഗ്രാം ഗ്രാമ്പുപ്പൊടി തേനിൽ ചാലിച്ച് ദിവസം രണ്ടു നേരം സേവിക്കുന്നത് ചുമ, പനി എന്നിവയെ ശമിപ്പിക്കും.
പല്ലു വേദനയ്‌ക്ക് ഏറ്റവും നല്ല ഔഷധമാണ് ഗ്രാമ്പു. ഗ്രാമ്പുവിന്റെ തൈലം പഞ്ഞിയിൽ ചാലിച്ച് വേദനയുള്ള പല്ലിന്റെ ഭാഗത്ത് മോണയിൽ തട്ടാതെ വച്ചാൽ വേദന ശമിക്കും.
വായ്‌നാറ്റമുള്ളവർ അല്‌പം ഗ്രാമ്പു തൈലം ചെറു ചൂടു വെള്ളത്തിലൊഴിച്ച് ഭക്ഷണത്തിനു ശേഷം വായിൽ കൊണ്ടാൽ ദുർഗന്ധത്തിന് ശമനമുണ്ടാകും.
വിര ശല്യത്തിന് ഗ്രാമ്പു നല്ലതാണ്. കായം, ഏലത്തരി ഗ്രാമ്പു എന്നിവ സമാസമം എടുത്ത് വറുത്തു പൊടിച്ച് തിളപ്പിച്ചാറ്റിയ വെള്ളത്തിലിട്ടു വയ്‌ക്കുക. ഒരു ദിവസത്തിനു ശേഷം ദിവസം മൂന്നോ നാലോ പ്രാവശ്യം ആ വെള്ളം കുടിക്കുക. പ്രഭാതത്തിൽ വെറും വയറ്റിലും രാത്രിയിൽ കിടക്കുന്നതിന് മുമ്പും കുടിക്കുന്നത് നന്നായിരിക്കും. വിരശല്യത്തെ പൂർണമായും ശമിപ്പിക്കുവാൻ ഇതുപകരിക്കും.
ഗ്രാമ്പുതൈലം ചേർത്തുള്ള ചെറു ചൂടുവെള്ളം തൊണ്ടയിൽ കൊണ്ടാൽ തോണ്ടവേദന പൂർണമായും ശമിക്കും.
ഗ്രാമ്പു തൈലം ചേർത്ത തിളപ്പിച്ച വെള്ളം കൊണ്ട് ആവി പിടിക്കുന്നത് കഫകെട്ട്, ജലദോഷം തുടങ്ങിയവയ്‌ക്ക് നല്ലതാണ്.
പൊടിച്ചതോ രണ്ട് ഗ്രാമ്പു മൊട്ട് വീതമോ, ചവച്ചിറക്കുന്നത് ചുമ, വായുകോപം എന്നിവയ്‌ക്ക് നല്ലതാണ്. ഗ്രാമ്പു തൈലം നെഞ്ചിലും കഴുത്തിലും പുരട്ടിയാലും ആശ്വാസം ലഭിക്കും.
ദഹനപ്രക്രിയയ്‌ക്ക് ഏറ്റവും സഹായകരമാണ് ഗ്രാമ്പു. ഇതിന്റെ ഇല, കായ്, തൊലി എന്നിവ വിവിധ ഭക്ഷണപദാർത്ഥങ്ങൾ പാചകം ചെയ്യുമ്പോൾ ഉപയോഗിക്കുന്നത് ഫലം ചെയ്യും.
Clove tree എന്ന ഇംഗ്ലീഷ് നാമത്തിലറിയപ്പെടുന്ന ഗ്രാമ്പു കോളറ രോഗത്തിന് ഫലപ്രദമാണെന്ന് ഗവേഷണഫലങ്ങൾ തെളിയിച്ചിട്ടുണ്ട്. കോളറയ്‌ക്ക് കാരണമാകുന്ന 'വിബ്രിയോ കോളറേ' എന്ന അണുവിനെ നശിപ്പിക്കുവാനുള്ള കഴിവ് ഗ്രാമ്പൂവിന് ഉണ്ടത്രേ. മികച്ച അണുനാശിനിയായ ഗ്രാമ്പുവിനെ ജൈവ കീടനാശിനിയുടെ ഘടകങ്ങളിലൊന്നായും ഉപയോഗിച്ചു വരുന്നുണ്ട്. കേരളത്തിന്റെ കാലാവസ്ഥയിൽ വളർത്തി എടുക്കാവുന്ന ഒരു ഔഷധവൃക്ഷമാണ് ഗ്രാമ്പു.
വ്യഞ്ജനങ്ങളുടെ റാണി
മനം മയക്കുന്നതാണ് ഏലക്കയുടെ സുഗന്ധം. എന്നാൽ കേവലം സുഗന്ധത്തിനുള്ളതാണോ ഏലക്ക, അല്ലേയല്ല. മികച്ച സുഗന്ധത്തോടൊപ്പം ഏറെ ഗുണങ്ങളും കൂടി അടങ്ങിയതാണ് ഏലക്ക. ഇതുനേരത്തെ അറിയാവുന്നതുകൊണ്ടാണ് നമ്മുടെ മലനിരകളിൽ സായിപ്പ് ധാരാളവുമായി ഏലം വച്ച് പിടിപ്പിച്ചതാണ്. വില കൂടിയും കുറഞ്ഞുമൊക്കെ ഇരിക്കുന്ന ഏലക്കയുടെ ഗുണത്തിൽ മാത്രം യാതൊരു ഇടിവുമില്ല. വിറ്റാമിൻ ബി 6, വിറ്റാമിൻ ബി 3, വിറ്റാമിൻ സി, സിങ്ക്, കാൽസ്യം, പൊട്ടാസ്യം എന്നിവ അടങ്ങിയിരിക്കുന്നതിനൊപ്പം പ്രോട്ടീനുകളും ആരോഗ്യകരമായ കൊഴുപ്പുകളും ഏലയ്‌ക്കയിൽ സമ്പന്നമായ അളവിൽ അടങ്ങിയിട്ടുണ്ട്.
വായ്‌നാറ്റം അകറ്റാം - ഏലയ്‌ക്കയിൽ ആന്റി ബാക്‌ടീരിയൽ സംയുക്തങ്ങളുടെ വലിയ ശേഖരം അടങ്ങിയിരിക്കുന്നു. വായയിൽ നിന്ന് ദുർഗന്ധം വമിക്കുന്ന സൂക്ഷ‌്‌മാണുക്കളെ നേരിടാനും ദന്ത ശുചിത്വം മെച്ചപ്പെടുത്താനും ഇവ സഹായിക്കുന്നു. ഭക്ഷണത്തിന് ശേഷം, ഏലയ്‌ക്ക ചവയ്‌ക്കുന്നത് വായിൽ പുതുമയാർന്ന സുഗന്ധം പകരാനും, വായ്‌നാറ്റം ഒഴിവാക്കുവാനും സഹായിക്കും.
വിളർച്ച തടയാം - ഇരുമ്പിന്റെ സമ്പന്നമായ ഉറവിടമായതിനാൽ, തലകറക്കം, അലസത തുടങ്ങിയ വിളർച്ചയുടെ ലക്ഷണങ്ങളെ ചെറുക്കാൻ ഏലയ്‌ക്ക സഹായിക്കുന്നു. വിറ്റാമിൻ സി സമ്പുഷ്‌ടമായ അളവിൽ അടങ്ങിയിട്ടുള്ള സുഗന്ധവ്യഞ്ജനം കൂടിയാണിത്. ഇത് ശരീരത്തിലെ കോശങ്ങളിൽ ഇരുമ്പിന്റെ ആഗിരണം വർദ്ധിപ്പിക്കുന്നു.
കൊഴുപ്പിനെ നീക്കാം - അടിവയറ്റിൽ കൊഴുപ്പ് അടിഞ്ഞുകൂടുന്നത് തടയാൻ ഏലയ്‌ക്ക മികച്ച രീതിയിൽ സഹായിക്കുന്നു. കൊഴുപ്പ് ശരീരത്തിൽ അധികമായി അടിഞ്ഞുകൂടുന്നത് ഉപാപചയ പ്രവർത്തനത്തെ തടസ്സപ്പെടുത്തുകയും ഹൃദയസംബന്ധമായ പ്രശ്‌നങ്ങളെ വർദ്ധിപ്പിക്കുകയും ചെയ്യുന്നു. ഏലം പതിവായി കഴിക്കുന്നത് വഴി ഇത്തരത്തിൽ അടിഞ്ഞുകൂടുന്ന കൊഴുപ്പിനെ നീക്കം ചെയ്യാൻ സഹായിക്കുന്നു.
ചുമ, ജലദോഷം അകറ്റാം - ചുമ, ജലദോഷസംബന്ധമായ പ്രശ്‌നങ്ങൾ പരിഹരിക്കാൻ ഏലയ്‌ക്ക വളരെ നല്ലതാണ്. തൊണ്ടയിലെ അണുബാധ, ചുമ തുടങ്ങിയ പ്രശ്‌നങ്ങൾക്ക് ഏലയ്‌ക്ക പൊടിച്ചതിൽ അൽപം തേൻ ചേർത്ത് കഴിക്കുന്നത് ഏറെ നല്ലതാണ്.
കറുവപ്പട്ട
ഒരുപാട് ഗുണങ്ങളുള്ള സുഗന്ധവ്യഞ്ജനമാണ് പട്ട. രക്തകോശങ്ങളിലെ സമ്മർദം കുറയ്‌ക്കുന്നു. രക്തം കട്ടയാകുന്നതും തടയുന്നു. ആർട്ടറികളിൽ രക്തം കട്ടയാകുന്നതാണ് ഹൃദയാഘാതങ്ങൾക്കും സ്‌ട്രോക്കുകൾക്കും കാരണമാകാറുള്ളത്. രക്തസമ്മർദം, കൊളസ്‌ട്രോൾ എന്നിവ കുറച്ച് ഹൃദ്രോഗങ്ങൾ തടയുന്നു. രോഗം വന്നിട്ട് ചികിത്സിക്കുന്നതിനേക്കാൾ നല്ലത് അത് തടയുന്നത് തന്നെയാണ്. ആരോഗ്യകരമായ ജീവിത ശൈലിയിലൂടെ നിങ്ങൾക്ക് ഹൃദ്രോഗങ്ങൾ തടയാം. നിത്യവുമുള്ള ഭക്ഷണത്തിൽ ഈ സസ്യങ്ങൾ ഉൾപ്പെടുത്തുകയും അനാവശ്യഭക്ഷണം ഒഴിവാക്കുകയും ചെയ്യുന്നത് കാലക്രമേണ ഗുണം ചെയ്യും. ഇപ്പോൾ നല്ലത് തെരഞ്ഞെടുത്താൽ ഭാവി സുരക്ഷിതമാക്കാം.
