ന്യൂഡൽഹി: കേരളത്തിൽ 2019ലെ റാങ്ക് ലിസ്റ്റിൽ നിന്ന് മുൻസിഫ് - മജിസ്ട്രേറ്റ് നിയമനം നടത്താൻ 2020 ഫെബ്രുവരി 20 ന് കേരള ഹൈക്കോടതി ഡിവിഷൻ ബെഞ്ച് പുറപ്പെടുവിച്ച ഉത്തരവ് സുപ്രീംകോടതി റദ്ദാക്കി. ജസ്റ്റിസ് ഡി.വൈ. ചന്ദ്രചൂഢ് ഉൾപ്പെട്ട മൂന്നംഗ ബെഞ്ചിന്റേതാണ് നടപടി.

2020ലെ നിയമനങ്ങൾ നടത്തേണ്ടത് 2020ലെ പരീക്ഷയിൽ നിന്നാണ്. 2019ൽ പ്രസിദ്ധീകരിച്ച ലിസ്റ്റിൽ നിന്ന് കുറഞ്ഞ റാങ്കിൽ ശേഷിക്കുന്നവരെ 2020ലെ നിയമനങ്ങളിൽ പരിഗണിക്കാനാകില്ലെന്ന് കോടതി നിരീക്ഷിച്ചു.

മെരിറ്റ് ലിസ്റ്റിൽ നിന്ന് ആദ്യം 32 പേർക്ക് നിയമനം നൽകിയിരുന്നു. പ്രൊമോഷനെത്തുടർന്ന് കൂടുതൽ ഒഴിവുകളുണ്ടെന്നും ചട്ടപ്രകാരം ഇതേ ലിസ്റ്റിൽ നിന്ന് ഒഴിവുകൾ നികത്തണമെന്നുമാവശ്യപ്പെട്ട് ഉദ്യോഗാർത്ഥികളായ കോട്ടയം സ്വദേശിനി ശ്വേത ശശികുമാർ ഉൾപ്പെടെയുള്ളവർ നൽകിയ ഹർജിയാണ് കേരള ഹൈക്കോടതി അനുവദിച്ചത്.