ന്യൂഡൽഹി: രാജ്യത്തെ കൊവിഡ് വാക്‌സിൻ കുത്തിവയ്പ്പ് യജ്ഞം പ്രധാനമന്ത്രി നരേന്ദ്രമോദി വീഡിയോ കോൺഫറൻസിംഗിലൂടെ ഉദ്ഘാടനം ചെയ്യും. ആരോഗ്യപ്രവർത്തകരുമായും പ്രധാനമന്ത്രി സംവദിക്കും. യു.പി, ഹരിയാന, ഡൽഹി തുടങ്ങിയ സംസ്ഥാനങ്ങളിലെ തിരഞ്ഞെടുക്കപ്പെട്ട ആശുപത്രികളിൽ ഇതിനുള്ള ഒരുക്കങ്ങൾ നടത്താൻ നിർദ്ദേശം നൽകിയതായും റിപ്പോർട്ടുണ്ട്. 16നാണ് വാക്സിൻ കുത്തിവയ്പ്പ് ആരംഭിക്കുന്നത്. ആരോഗ്യപ്രവർത്തകരും കൊവിഡ് മുന്നണിപോരാളികളുമായ മൂന്ന് കോടി പേർക്കാണ് ആദ്യം കൊവിഡ് വാക്സിൻ വിതരണം. ഇതിനുള്ള ചെലവ് പൂർണമായും കേന്ദ്രസർക്കാർ വഹിക്കും.
രാജ്യത്തെ തന്നെ വലിയ കൊവിഡ് ആശുപത്രിയായ എൽ.എൻ.ജെ.പി ആശുപത്രിയിലെ ആരോഗ്യപ്രവർത്തകർക്കാണ് ഡൽഹിയിൽ ആദ്യം കുത്തിവയ്പ്പ്. ഈ ചടങ്ങിൽ മുഖ്യമന്ത്രി അരവിന്ദ് കേജ്‌രിവാളും ആരോഗ്യമന്ത്രി സത്യേന്ദർ ജെയിനും പങ്കെടുക്കും.