ന്യൂഡൽഹി: കാർഷിക നിയമം സംബന്ധിച്ച് കർഷകരെ തെറ്റിദ്ധരിപ്പിക്കുന്ന പ്രസ്താവനയാണ് വയനാട്ടിൽ രാഹുൽ ഗാന്ധി എം.പി നടത്തിയിരിക്കുന്നതെന്ന് കേന്ദ്ര വിദേശകാര്യ സഹമന്ത്രി വി. മുരളീധരൻ പറഞ്ഞു. നിയമത്തെക്കുറിച്ച് കർഷകർക്ക് ധാരണ ഉണ്ടായാൽ രാജ്യമൊട്ടാകെ പ്രതിഷേധം ഉയരുമായിരുന്നെന്ന രാഹുലിന്റെ പരാമർശം കലാപത്തിന് വഴിമരുന്നിടാനുള്ള നീക്കമാണ്. റിപ്പബ്ലിക് ദിനത്തിൽ ട്രാക്ടർ റാലിയുടെ മറവിൽ വൻതോതിലുള്ള അക്രമങ്ങൾ ഡൽഹിയിൽ നടത്തിയത് കണ്ടിട്ടും കലാപത്തെ പ്രോത്സാഹിപ്പിക്കുന്ന പ്രതികരണം നടത്താൻ എങ്ങിനെയാണ് രാഹുലിന് കഴിയുന്നത്. വിരുന്നുകാരനായി എത്തുമ്പോഴെങ്കിലും കാർഷിക നിയമം പഠിച്ച് തന്റെ മണ്ഡലത്തിലെ കർഷകരോട് നിയമത്തെ കുറിച്ച് ചോദിക്കാൻ സമയം കണ്ടെത്തുകയാണ് രാഹുൽ ചെയ്യേണ്ടത്. കർഷക പ്രക്ഷോഭത്തിന്റെ മറവിൽ നടന്ന അക്രമങ്ങൾക്ക് പിന്തുണ നൽകുന്ന രാഹുലിന്റെ സമീപനം അപലപനീയമാണെന്നും മന്ത്രി പറഞ്ഞു.