കൊച്ചി: ജില്ലയിലെ നിയമസഭാ തിരഞ്ഞെടുപ്പ് ക്രമീകരണങ്ങൾ ചർച്ച ചെയ്യുന്നതിനായി കേന്ദ്ര ഡെപ്യൂട്ടി തിരഞ്ഞെടുപ്പ് കമീഷ്ണർ സുധീപ് ജെയിന്റെ അദ്ധ്യക്ഷതയിൽ അവലോകന യോഗം ചേർന്നു. ഓൺലൈനായി ചേർന്ന യോഗത്തിൽ ജില്ലാ കളക്ടർ എസ്.സുഹാസ് , കൊച്ചി സിറ്റി പൊലീസ് കമീഷ്ണർ നാഗരാജു, ജില്ലാ തിരഞ്ഞെടുപ്പ് വിഭാഗം ഡപ്യൂട്ടി കളക്ടർ പി.എ.പ്രദീപ് തുടങ്ങിയവർ പങ്കെടുത്തു. പോളിംഗ് ബൂത്തുകളുടെ സജ്ജീകരണങ്ങളും ആശയ വിനിമയ സംവിധാനങ്ങളും ചർച്ച ചെയ്തു. ആശയ വിനിമയ സംവിധാനമില്ലാത്ത കുട്ടമ്പുഴ പഞ്ചായത്തിലെ ഉൾപ്പടെ 14 ബൂത്തുകളിൽ പുതിയ ക്രമീകരണങ്ങൾ ഉൾപ്പെടുത്തും. കൊവിഡ് പശ്ചാത്തലത്തിൽ 1000 വോട്ടർമാരിൽ കൂടുതലുള്ള ബൂത്തുകളിൽ ഉപ ബൂത്തുകൾ ഏർപ്പെടുത്തും.

80 വയസു കഴിഞ്ഞവർക്ക് തപാൽ വോട്ട് ഏർപ്പെടുത്തുന്നതടക്കം യോഗത്തിൽ ചർച്ച ചെയ്തു. മുഴുവൻ ബൂത്തുകളും ഭിന്നശേഷി സൗഹൃദമായിരിക്കണം. ക്രമസമാധാന പാലനത്തിനുള്ള സംവിധാനങ്ങളും യോഗം വിലയിരുത്തി.