ഏലൂർ: വസന്തത്തിന്റെ ഇടിമുഴക്കത്തിന് കാതോർത്തിരിക്കുന്ന നക്സലൈറ്റ് കുഞ്ഞപ്പൻ 83ാം വയസിലും തീഷ്ണമായ ചി​ന്തകളും നി​ലപാടുകളും കൈവി​ടാതെയാണ് ജീവി​തം.

പൊലീസിന്റെ ക്രൂര മർദ്ദനമേൽക്കാത്ത ഒരിഞ്ചു സ്ഥലം ആ ശരീരത്തിലില്ല. അടിയന്തിരാവസ്ഥയിലെ കുപ്രസിദ്ധമായ ഉരുട്ടലിന് വിധേയനായിട്ടുണ്ട്. കുമ്പള കേസിൽ രണ്ടാം പ്രതിയായി ജീവപര്യന്തം തടവ് കി​ട്ടി​. ആറു കർഷക തൊഴിലാളികളെ ഗുണ്ടകളെ വിട്ട് മർദ്ദിച്ചു കൊന്ന ജന്മിയായ മക്കാ ഹാജിയെ പൊതിരെ തല്ലാൻ പാർട്ടി നിയോഗിച്ച സംഘത്തിന്റെ നേതൃത്വം കുഞ്ഞപ്പനായിരുന്നു. ദൗത്യം നിറവേറ്റാനെത്തിയപ്പോൾ മക്കാ ഹാജിയാടെ സഹോദരൻ അബു ഹാജി കൊല്ലപ്പെട്ടു. ജയിൽ ശിക്ഷ കിട്ടിയപ്പോൾ പി​.ആൻഡ് ടി​യി​ലെ ജോലി പോയി​. പ്രായമായ മാതാപിതാക്കളും സഹോദരിയും കുട്ടിയും ഭാര്യയും മക്കളും അടങ്ങുന്ന കുടുംബം പട്ടിണിയിലായി . കുടുംബം പോറ്റാൻ ഭാര്യ കാർത്ത്യായനി കൂലി പണി ചെയ്തു. ഇന്ന് തിരിഞ്ഞ് നോക്കുമ്പോൾ അനുഭവിച്ച പീഡനങ്ങളും ദുരിതവും ഓർത്ത് സങ്കടപ്പെടുന്നില്ല. നല്ലൊരു നാളെക്കു വേണ്ടിയായിരുന്നു തന്റെ ജീവി​തമെന്നാണ് കുഞ്ഞപ്പന്റെ നി​ലപാട്. പുലയ സമുദായത്തിൽ പിറന്നതിന്റെ അവഗണനകളും അയിത്തവും അനുഭവിച്ചറിഞ്ഞു.

സർവ്വീസിലിരിക്കുമ്പോഴാണ് ഇടത് തീവ്ര ആശയത്തോട് അടുക്കുന്നതും സജീവമാകുന്നതും. 50,000 രൂപ സർക്കാർ തലയ്ക്ക് വിലയിട്ട വെള്ളത്തൂവൽ സ്റ്റീഫനെ വീട്ടിൽ ഒളിവിൽ പാർപ്പി​ച്ചതോടെ പൊലീസി​ന്റെ നോട്ടപ്പുള്ളി​യായി​. കുഞ്ഞപ്പനെ കാണാൻ വന്നി​രുന്നവർ പൊലീസ് തേടുന്ന പ്രമുഖ നക്സൽ നേതാക്കളായിരുന്നെന്ന് പാവം ഭാര്യ മനസിലാക്കുന്നത് പിന്നീടാണ്.

2015ൽ സി​.പി​.ഐ (എം.എൽ) സ്ഥാനാർത്ഥി​യായി​ ഏലൂർ നഗരസഭാ കൗൺസിലി​ലേക്ക് തി​രഞ്ഞെടുക്കപ്പെട്ടു. പണം, പദവി, പ്രശസ്തി ഒന്നിന്റെയും പുറകെ പോകാത്ത രാഷ്ടീയ പ്രവർത്തനമായിരുന്നു കുഞ്ഞപ്പന്റേത്. അനാരോഗ്യത്തെ തുടർന്ന് ഇപ്പോൾ വി​ശ്രമജീവി​തത്തി​ലാണ് ഇദ്ദേഹം.