കൊച്ചി: ശ്രേഷ്ഠ വൈദികരുടെ സംഭാവനകൾ വിവിധ മേഖലകളിലുള്ള കേരള സമൂഹത്തിന്റെ വളർച്ചയെ ത്വരിതപ്പെടുത്തിയിട്ടുണ്ടെന്ന് ആർച്ച്ബിഷപ് ഡോ.ജോസഫ് കളത്തിപ്പറമ്പിൽ പറഞ്ഞു. ഡോ. വിൻസന്റ് വാരിയത്തിന്റെ 'പള്ളീലച്ചൻ' എന്ന പുസ്തകത്തിന്റെ പ്രകാശനം നിർവഹിക്കുകയായിരുന്നു ആർച്ച്ബിഷപ്പ്.
വൈദികർക്കും, സന്യസ്ത്യർക്കും വൈദികാർത്ഥികൾക്കും ധ്യാനഗുരു എന്ന നിലയിൽ കേരളത്തിലുടനീളം വിഖ്യാതനാണ് വിൻസന്റ് അച്ചൻ. സെമിനാരി പ്രവേശനം മുതൽ വൈദികന്റെ മരണം വരെയുള്ള ജീവിതമാണ് പുസ്തകത്തിന്റെ പ്രമേയം. കെ.സി.ബി.സി. ഡപ്യൂട്ടി സെക്രട്ടറി ജനറൽ ഫാ.ജേക്കമ്പ് പാലയ്ക്കപ്പിള്ളി ആദ്യപുസ്തകം ഏറ്റുവാങ്ങി. വരാപ്പുഴ അതിരൂപത വികാരി ജനറൽമാരായ മോൺ. മാത്യു കല്ലിങ്കൽ, മോൺ. മാത്യു ഇലഞ്ഞിമറ്റം, ചാൻസലർ ഫാ. എബിജിൻ അറക്കൽ, ജെക്കോബി, ഡോ.ജോസ് തളിയത്ത്, ഷാജി ജോർജ് എന്നിവർ പ്രസംഗിച്ചു.