കൊച്ചി: അസംഘടിത മേഖലയിലെ കുറഞ്ഞ വരുമാനക്കാരായ തൊഴിലാളികൾക്ക് അത്യാധുനിക സൗകര്യങ്ങളോടെ താമസസൗകര്യം നൽകുന്ന ജനനി അപ്പാർട്ട്മെന്റ് നിർമ്മാണം പൂർത്തിയായി. പെരുമ്പാവൂർ പോഞ്ഞാശേരിയിൽ നിർമ്മിച്ച അപ്പാർട്ട്‌മെന്റിന്റെ അവസാന മിനുക്കുപണികൾ മാത്രമാണ് ശേഷിക്കുന്നത്. സംസ്ഥാന സർക്കാരിന്റെ തൊഴിലും നൈപുണ്യവും വകുപ്പിനു കീഴിലുള്ള പൊതുമേഖലാസ്ഥാപനമായ ഭവനം ഫൗണ്ടേഷൻ കേരളയാണ് (ബി.എഫ്.കെ) അപ്പാർട്ട്മെന്റ് നിർമ്മിച്ചത്.
ജനനി പോഞ്ഞാശേരി
അപ്പാർട്ട്മെന്റ് വിസ്തൃതി 715 ചതുരശ്ര അടി
ആകെ യൂണിറ്റുകൾ 74
14 നിലകളുള്ള 4 ടവറുകൾ
മൊത്തം 296 അപ്പാർട്ട്‌മെന്റെുകൾ
നാല് ടവറുകളിൽ 2,56,000 ചതുരശ്ര അടി
ടവർ ഒന്നിന്റെ ചെലവ് : 16 കോടി രൂപ
നാലു ടവറുകൾക്ക് ചെലവ് 64 കോടി രൂപ
ജില്ലയിലെ പാവപ്പെട്ട തൊഴിലാളികൾക്ക് മിതമായ നിരക്കിൽ അപ്പാർട്ട്മെന്റ് ലഭ്യമാകും. രണ്ട് കിടപ്പുമുറികളും ഒരു ലിവിംഗ് കം ഡൈനിംഗ് ഏരിയയും അടുക്കളയും കുളിമുറിയും ടോയ്‌ലറ്റുമാണുള്ളത്. അപാർട്ട്‌മെന്റ് കോംപ്ലക്‌സിന് അഗ്നിബാധശമന സംവിധാനം, ലിഫ്റ്റുകൾ, ഡീസൽ ജനറേറ്റർ സംവിധാനം, പാർക്കിംഗ് സൗകര്യങ്ങൾ മുതലായവയുമുണ്ട്. അടുത്ത മാസം അപ്പാർട്ട്‌മെന്റിന്റെ ഉദ്ഘാടനം നടത്താനാണ് ലക്ഷ്യമിടുന്നതെന്ന് ബി.എഫ്.കെ അധികൃതർ അറിയിച്ചു.
തൊഴിലാളി സൗഹൃദം ബി.എഫ്.കെ
കേരളത്തിലെ തൊഴിലാളികൾക്കും കുറഞ്ഞ വേതനക്കാരായ ജീവനക്കാർക്കും സുരക്ഷിതമായ പാർപ്പിടം, മറ്റ് അനുബന്ധ അടിസ്ഥാന സൗകര്യങ്ങൾ എന്നിവ പ്രദാനം ചെയ്യുകയാണ് കമ്പനിയുടെ ലക്ഷ്യം.
കേരളത്തിലെ അസംഘടിത മേഖലയിലെ വരുമാനം കുറഞ്ഞ തൊഴിലാളികൾക്കും ജോലിക്കാർക്കും സ്വന്തം അപ്പാർട്ട്മെന്റ് മിതമായ വിലയ്ക്ക് നൽകുന്നതാണ് ജനനി പദ്ധതി. കേരളത്തിലെ തോട്ടം തൊഴിലാളികൾക്കും അവരുടെ കുടുംബങ്ങൾക്കും നിലവാരമുള്ള ഭവനം അവരുടെ ജോലിസ്ഥലത്തോ അതിനടുത്തോ നിർമ്മിച്ച് നൽകുന്ന ഭവനം പദ്ധതി.കേരളത്തിൽ ജോലി ചെയ്യുന്ന അതിഥി തൊഴിലാളികൾക്ക് കുറഞ്ഞ നിരക്കിൽ വാടകയ്ക്ക് നൽകുന്ന ഹോസ്റ്റൽ നിർമ്മിക്കുന്ന അപ്നാഘർ പദ്ധതിയും ഭവനം ഫൗണ്ടേഷൻ കേരള വഴി നടപ്പിലാക്കുന്നു.