കോലഞ്ചേരി: വടവുകോട് ബ്ലോക്ക് പഞ്ചായത്ത് ധനകാര്യ സ്ഥിരം സമിതി അംഗങ്ങളുടെ തിരഞ്ഞെടുപ്പിൽ വനിതാ പ്രതിനിധിയെ തിരഞ്ഞെടുക്കാനായില്ല. വനിതകളാരും മത്സരിക്കാൻ തയ്യാറാകാത്തതാണു കാരണം. വനിതാ പ്രതിനിധിയെ നിശ്ചയിക്കാൻ ഇന്നു വീണ്ടും യോഗം ചേരും. 13 അംഗ കമ്മി​റ്റിയിൽ 7 പേർ വനിതകളാണ്. ഒരു കമ്മി​റ്റിയിലെ അംഗത്തിനു മ​റ്റു കമ്മി​റ്റികളിൽ അംഗമാകാൻ കഴിയില്ല. ധനകാര്യ സമിതിയുടെ അദ്ധ്യക്ഷ വൈസ് പ്രസിഡന്റായിരിക്കുമെന്ന ചട്ടം നിലവിലുള്ളതിനാൽ ഇതിൽ അംഗമായാൽ മ​റ്റു കമ്മി​റ്റികളിൽ എത്താനാകില്ല. മ​റ്റു കമ്മി​റ്റികളിൽ ഭൂരിപക്ഷം ഉറപ്പാക്കി അദ്ധ്യക്ഷ സ്ഥാനം കരസ്ഥമാക്കാനുള്ള ശ്രമത്തിൽ അംഗങ്ങളെല്ലാം ധനകാര്യ സമിതി അംഗത്വം വിട്ടു കളയുകയായിരുന്നു. മ​റ്റു കമ്മി​റ്റികളിൽ അംഗങ്ങളല്ലാത്ത വനിതകളെ സ്ഥാനാർത്ഥികളായി പ്രഖ്യാപിച്ച് വരണാധികാരി ധന കാര്യ കമ്മിറ്റിയിലേക്കുള്ള തിരഞ്ഞെടുപ്പു നടത്തുകയാണ് ഇനി ചെയ്യുന്നത്. കോൺഗ്രസിനും ട്വൻറി20 ക്കും 5 വീതം സീ​റ്റുകളും എൽ.ഡി.എഫിനു 3 സീറ്റുകളുമുള്ള ഈ ബ്ലോക്ക് പഞ്ചായത്ത് ഭരിക്കുന്നത് കോൺഗ്രസാണ്.