ആലുവ: ശതാബ്ദി നിറവിലെത്തിയ ആലുവ യു.സി കോളേജിന് സംസ്ഥാന സർക്കാർ ബ‌ഡ്ജറ്റിൽ അഞ്ച് കോടി രൂപ അനുവദിച്ചു. ശതാബ്ദി സ്മാരക ലൈബ്രറി നിർമ്മിക്കുന്നതിന് ജില്ലയിൽ നിന്നുള്ള രണ്ട് എം.പി മാരും ഏഴ് എം.എൽ.എമാരും മുഖ്യമന്ത്രിക്ക് നൽകിയ നിവേദനത്തെ തുടർന്നാണിത്.
90 വർഷം പിന്നിട്ട കെട്ടിടത്തിലാണ് നിലവിൽ കോളേജ് ലൈബ്രറി പ്രവർത്തിക്കുന്നത്.
കോളേജിന് ഓട്ടോണമസ് പദവി ലഭിക്കുന്നതിന് യു.ജി.സിയോട് ശുപാർശ ചെയ്യുക, എയ്ഡഡ് സ്കീമിൽ പുതുതലമുറ കോഴ്സുകൾ അനുവദിക്കുക, തിരുവിതാംകൂർ മഹാരാജാവിന്റെ പഴയ കോടതി സമുച്ചയമായിരുന്ന 'കച്ചേരിമാളിക'യുടെ പുനരുദ്ധാരണത്തിന് ആർക്കിയോളജി വകുപ്പിന്റെ നേതൃത്വത്തിൽ നടപടിയെടുക്കുക എന്നീ ആവശ്യങ്ങളും നിവേദനത്തിൽ ഉന്നയിച്ചിരുന്നു.
എം.പിമാരായ ബെന്നി ബഹനാൻ, ഹൈബി ഈഡൻ, എം.എൽ.എമാരായ അൻവർ സാദത്ത്, എസ്. ശർമ്മ, വി.ഡി. സതീശൻ, പി.ടി. തോമസ്, ടി.ജെ. വിനോദ്, റോജി എം. ജോൺ, വി.പി. സജീന്ദ്രൻ, എൽദോസ് കുന്നപ്പിള്ളി എന്നിവരാണ് നിവേദനത്തിൽ ഒപ്പുവച്ചത്.