കളമശേരി: സീറോ ബാലൻസിൽ ദീർഘയാത്ര തുടരുകയാണ് നീലേശ്വരം സ്വദേശി അക്ഷയ് വേലായുധൻ. ഡിസംബർ 11ന് രാവിലെ പത്തരക്ക് നീലേശ്വരത്തു നിന്ന് തുടങ്ങിയ കാൽനട യാത്ര വെള്ളിയാഴ്ച ആലങ്ങാടെത്തി​. ഇന്നലെ വി​ശ്രമം അരൂരി​ലായിരുന്നു. ഇന്നു രാവിലെ ആലപ്പുഴയിലേക്ക്, സമാപനം തിരുവനന്തപുരം മ്യൂസിയത്തിനു മുന്നിൽ. എത്തുമ്പോൾ എത്തും. നി​ശ്ചി​ത തീയതി​യൊന്നുമി​ല്ല. യാത്രയിൽ പണ്ടേ കമ്പക്കാരനാണ് 22കാരനായ അക്ഷയ്. ഗോവ, മൈസൂർ ബാംഗളൂരു , മംഗലാപുരം ,കന്യാകുമാരി എന്നിവിടങ്ങളിൽ ബൈക്കിൽ സഞ്ചരിച്ചിട്ടുണ്ട്. വീട്ടുകാരുടെ ചെലവിൽ കറങ്ങേണ്ടെന്ന തീരുമാനത്തിന്റെ പേരിലാണ് ഇപ്പോൾ സീറോ ബാലൻസിലെ കാൽനടയാത്ര. സഞ്ചാരത്തിന് പണം വേണ്ടെന്നതാണ് യാത്രാസന്ദേശം.

മൂന്നു ജോഡി വസ്ത്രം, ഒരു പുതപ്പ്, ടെന്റ് എന്നിവയാണ് മുതുകി​ലെ ബാഗി​ലെ സ്വത്ത്. ഭാരം ബുദ്ധിമുട്ടായപ്പോൾ ടെന്റ് ഉപേക്ഷിച്ചു. വാട്സ്അപ്, ഇൻസ്റ്റഗ്രാം വഴി സുഹൃത്തുക്കൾ പി​ന്തുടരുന്നുണ്ട്. പലയി​ടത്തും സഹായങ്ങളും ലഭി​ക്കുന്നു. ഭക്ഷണത്തിനും വിശ്രമത്തിനും ഇതുവരെ തടസങ്ങളില്ല. ദിവസം ശരാശരി​ 30-40 കിലോ മീറ്റർ നടക്കും. തൃശൂരിലെത്തിയപ്പോൾ സേവാഭാരതി ആഹാരവും കിടക്കാനിടവും കൊടുത്തു. വഴിക്ക് വച്ച്‌ ചിലർ സ്നേഹപൂർവം തന്ന പണം സ്വീകരിച്ചു. പക്ഷേ ചെലവാക്കില്ലന്നാണ് ദൃഢനി​ശ്ചയം. തി​രുവനന്തപുരം റീജി​യണൽ കാൻസർ സെന്ററിനുള്ളതാണ് ഇങ്ങി​നെ കി​ട്ടുന്ന തുക. കിട്ടുന്ന ഭക്ഷണവും വെള്ളവും ഒരു പങ്ക് വഴിയരികിൽ കണ്ടുമുട്ടുന്ന സാധുക്കൾക്ക് വിതരണം ചെയ്യും.കോഴിക്കോട് ജില്ലാ കബഡി​ ടീമംഗമായിരുന്നു അക്ഷയ്. ഫുട്ബോളിൽ കോളേജ് ടീമിലും ഉണ്ടായിരുന്നു. കൂലി പണിക്കാരനായ വേലായുധന്റെയും റീനയുടെയും മകനായ അക്ഷയ് സിവിൽ എൻജിനീയറിംഗ് ഡി​പ്ളോമക്കാരനാണ്. സഹോദരി അപർണ രണ്ടാം വർഷ ബിരുദ വിദ്യാർത്ഥിനി.

യാതൊരു ടെൻഷനുമില്ലാത്ത ഈ യാത്ര ആസ്വദിക്കുകയാണ്. രാജ്യം മുഴുവൻ സഞ്ചരിക്കണമെന്നാണ് ആഗ്രഹം.

അക്ഷയ്