കൊച്ചി: നഗരത്തിന്റെ വികസന കാര്യങ്ങളിൽ എല്ലാവരെയും വിശ്വാസത്തിലെടുത്തും സഹകരിപ്പിച്ചും മുന്നേറുന്നതിനാണ് ലക്ഷ്യമിടുന്നതെന്ന് മേയർ അഡ്വ.എം.അനിൽകുമാർ പറഞ്ഞു. എറണാകുളംഅങ്കമാലി അതിരൂപതാ സാമൂഹ്യ പ്രവർത്തന വിഭാഗമായ സഹൃദയയുടെ ആഭിമുഖ്യത്തിൽ തദ്ദേശ സ്വയംഭരണ തിരഞ്ഞെടുപ്പിലെ വിജയികൾക്കായി ഒരുക്കിയ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സാമൂഹ്യ വികസന പ്രവർത്തനങ്ങളിൽ സഹൃദയയുടെ മാതൃകകൾ പ്രചോദനമാണെന്ന് അദ്ദേഹം പറഞ്ഞു. സഹൃദയ സ്വയം സഹായ സംഘങ്ങൾക്കുള്ള മൂന്നേകാൽ കോടി രൂപയുടെ സ്വയംതൊഴിൽ വായ്പയുടെ ചെക്ക് വിതരണവും മേയർ നിർവഹിച്ചു. പൊന്നുരുന്നി സഹൃദയ ഓഡിറ്റോറിയത്തിൽ നടത്തിയ സമ്മേളനത്തിൽ അതിരൂപതാ മെത്രാപ്പോലീത്തൻ വികാരി ആർച്ച് ബിഷപ്പ് മാർ ആന്റണി കരിയിൽ അദ്ധ്യക്ഷനായി. സഹൃദയ കലണ്ടറിന്റെ പ്രകാശനം സിനിമാതാരം സിജോയ് വർഗീസും ഡയറിയുടെ പ്രകാശനം ഉദയനാപുരം ഗ്രാമ പഞ്ചായത്ത് പ്രസിഡന്റ് ഗിരിജ പുഷ്‌കരനും ജീവൻ മധുർ പോളിസി വിതരണ ഉദ്ഘാടനം കാടുകുറ്റി ഗ്രാമപഞ്ചായത്ത് പ്രസിഡന്റ് പ്രിൻസി ഫ്രാൻസീസും നിർവഹിച്ചു. സഹൃദയ ഡയറക്ടർ ഫാ.ജോസ് കൊളുത്തുവെള്ളിൽ, അസി.ഡയറക്ടർ ഫാ.ജിനോ ഭരണികുളങ്ങര, ജനറൽ മാനേജർ പാപ്പച്ചൻ തെക്കേക്കര എന്നിവർ സംസാരിച്ചു.