മൂവാറ്റുപുഴ: മുക്കാൽ നൂറ്റാണ്ട് പഴക്കമുള്ള മൂവാറ്റുപുഴ ജനറൽ ആശുപത്രിയിലെ അത്യാഹിത വിഭാഗത്തിലെ കെട്ടിടം നവീകരണത്തിനൊരുങ്ങുന്നു. കാലപഴക്കത്താൽ ചോർന്നൊലിക്കുന്ന കെട്ടിടെ നവീകരിക്കുന്നതിന് എൻ.എച്ച്.എം.സഹകരണത്തോടെ ബി.പി.സി.എലിന്റെ സി.എസ്.ആർ ഫണ്ടിൽ നിന്നും അനുവദിച്ച 25ലക്ഷം രൂപ മുതൽ മുടക്കിയാണ് അത്യാഹിത വിഭാഗം നവീകരിക്കുന്നത്. ആദ്യകാലങ്ങളിൽ ഈ കെട്ടിടത്തിലായിരുന്നു ആശുപത്രിയുടെ ഒ.പിയും, ഫാർമസിയും പ്രവർത്തിച്ചു വന്നിരുന്നത്.പിന്നീട് പുതിയ കെട്ടിടങ്ങൾ വന്നതോടെ ഇത് ക്യാഷ്വാലിറ്റിയാക്കുകയായിരുന്നു. അത്യാഹിത വിഭാഗം പ്രവർത്തിക്കുന്ന കെട്ടിടം നവീകരിക്കുന്നതിന്റെ മുന്നോടിയായി അത്യാഹിത വിഭാഗത്തിന്റെ പ്രവർത്തനം പഴയ ഒ.പി കെട്ടിടത്തിലേക്കു മാറ്റിയിട്ടുണ്ട്. ഓഫ്ത്താൽമോളജി, സ്‌കിൻ എന്നീ വിഭാഗങ്ങളുടെ ഒപി പ്രവർത്തനം പ്രധാന ഒ.പി കെട്ടിടത്തിലേക്കു മാറ്റി.

ഉദ്ഘാടനം 23 ന്

നവീകരണ പ്രവർത്തനങ്ങളുടെ ഉദ്ഘാടനം 23 ന് രാവിലെ 10.30ന് എൽദോ എബ്രഹാം എം.എൽ.എ നിർവഹിക്കും. നഗരസഭ ചെയർമാൻ പി.പി.എൽദോസ് അദ്ധ്യക്ഷത വഹിക്കും.ഒട്ടേറെ പരിമിതികൾ ഉള്ള ജനറൽ ആശുപത്രിയുടെ അത്യാഹിത വിഭാഗം നവീകരിക്കുന്നതിന്റെ ഭാഗമായി സീലിംഗ് മാറ്റി സ്ഥാപിക്കൽ, പ്രത്യേക മുറികൾ, പുതുതായി രണ്ട് ശുചിമുറികൾ, രോഗികൾക്ക് വിശ്രമ കേന്ദ്രം അടക്കമാണ് നിർമിക്കുന്നത്.