കോലഞ്ചേരി: റിപ്പബ്ലിക് ദിന പരേഡിലേക്ക് ഇക്കുറിയും സെന്റ് പീറ്റേഴ്‌സ് കോളേജ് എൻ.സി.സി യൂണിറ്റിന്റെ സാന്നിദ്ധ്യം. യൂണിറ്റിലെ അംഗമായ സർജന്റ് റോസ് ബേബിയാണ് കോളേജിനെ പ്രതിനിധീകരിക്കുക. മൂന്ന് പ്രീ റിപ്പബ്ലിക് ദിന എൻ.സി.സി ക്യാമ്പുകളിലെ മികച്ച പ്രകടനത്തിന്റെ അടിസ്ഥാനത്തിലാണ് റോസിനു സെലക്ഷൻ ലഭിച്ചത്. കേരളത്തിൽ നിന്നും ഈ വർഷം 26 കേഡറ്റുകൾക്ക് മാത്രമാണ് ഡൽഹിയിൽ നടക്കുന്ന ക്യാമ്പിൽ പങ്കെടുക്കുവാൻ അവസരം ലഭിച്ചത്. കുട്ടനാടൻ പാട്ടിന്റെ താളത്തിനൊത്തുള്ള ഇവരുടെ പരിശീലന വീഡിയോ നവമാധ്യമങ്ങളിൽ ശ്രദ്ധ നേടിയിരുന്നു. ജിൻ അലക്‌സാണ്ടർ നയിക്കുന്ന സെന്റ് പീറ്റേഴ്‌സ് കോളേജ് യൂണിറ്റിലെ കേഡറ്റുകൾ ഇതു തുടർച്ചയായി രണ്ടാം തവണയാണ് റിപ്പബ്ലിക് ദിന പരേഡിൽ പങ്കെടുക്കുന്നത്. കഴിഞ്ഞ വർഷം രണ്ട് കേഡറ്റുകൾ പങ്കെടുത്തിരുന്നു. രണ്ടാം വർഷ ഇംഗ്ലീഷ് ബിരുദ വിദ്യാർത്ഥിനിയായ റോസ് ബേബി, പാപ്പൻപടി വള്ളൂരാൻ പി.കെ.ബേബി വി.ആർ. റീത്ത ദമ്പതികളുടെ മകളാണ്.