ചെറുതോണി: ചുരുളി ശ്രീനാരായണ ഗുരുദേവ ക്ഷേത്രത്തിൽ ഉത്രട്ടാതി മഹോത്സവത്തിന് ഒരുക്കങ്ങൾ ആരംഭിച്ചു. 30 വർഷം മുമ്പ് ഹൈറേഞ്ചിലെ ഹൈന്ദവ വിശ്വാസികൾക്ക് ആത്മീയ ആവശ്യങ്ങൾക്കായി സ്ഥാപിതമായതാണ് ചുരുളി ശ്രീനാരായണ ഗുരുദേവ ക്ഷേത്രം. ക്ഷേത്രത്തിലെ തിരുവുത്സവം 14 മുതൽ 18 വരെയാണ് നടക്കുക. ജനുവരി 12ന് ധ്വജപ്രതിഷ്ഠാ വാർഷികം ആഘോഷിക്കും. 5.30ന് പ്രഭാതഭേരിയോടെ ആരംഭിക്കുന്ന പരിപാടികൾ വൈകിട്ട് 6.45 ന് ദീപാരാധനയോടെ സമാപിക്കും. 14ന് രാവിലെ 6.45ന് ബ്രഹ്മശ്രീ സുകുമാരൻ തന്ത്രികൾ തൃക്കൊടിയേറ്റ് നിർവഹിക്കും. 18ന് വൈകിട്ട് 6.30ന് വിശേഷാൽ ദീപാരാധന പൂമൂടലിന് ശേഷം ഉത്സവത്തിന്റെ കൊടിയിറങ്ങും. പ്രഭാതഭേരി, മഹാഗണപതി ഹോമം, ഗുരുപൂജ, ശുദ്ധ ക്രിയ, കലശപൂജ, കലശാഭിഷേകം, ദീപാരാധന, പറ നിറയ്ക്കൽ, മദ്ധ്യാഹ്ന പൂജ, അത്താഴപൂജ, വിദ്യാഗോപാലമന്ത്രാർച്ചന, തിലഹ വനവും മഹാസുദർശന ഹോമവും ഉൾപ്പെടെയുള്ള വിശേഷാൽ പൂജകൾ മഹോത്സവത്തോടനുബന്ധിച്ച് ഉണ്ടായിരിക്കും. ഉത്സവത്തിന് മുന്നോടിയായി സ്വാഗതസംഘം രൂപീകരിച്ചു പ്രവർത്തനങ്ങൾ ആരംഭിച്ചു. എസ്.എൻ.ഡി.പി യോഗം ഇടുക്കി യൂണിയൻ സെക്രട്ടറി സുരേഷ് കോട്ടയ്ക്കകത്ത്, യൂണിയൻ കൗൺസിലർ അനീഷ് പീച്ചിലാംകുന്നേൽ എന്നിവരാണ് രക്ഷാധികാരികൾ. പൂർണമായും കൊവിഡ് പ്രോട്ടോകോൾ പാലിച്ചുവേണം ഭക്തജനങ്ങൾ ഉത്സവത്തിൽ പങ്കെടുക്കാനെന്ന് ശാഖാ പ്രസിഡന്റ് പി.കെ. മോഹൻ ദാസ്, സെക്രട്ടറി ഷൺമുഖദാസ്, ക്ഷേത്രം ശാന്തി എൻ.ആർ. പ്രമോദ് ശാന്തികൾ, കലേഷ് വിരിപ്പിൽ, ബൈജു ഈറ്റവേലിൽ, മല്ലിക ശിവദാസ് എന്നിവർ അറിയിച്ചു.