തൊടുപുഴ: ഇടുക്കി റോഡിലുള്ള സെൻട്രൽ ജുമാ മസ്ജിദിൽ നിന്ന് പണം മോഷണം പോയതായി പരാതി. പള്ളിയിൽ സാധുജന സഹായ നിധി സമാഹരണത്തിനായുണ്ടായിരുന്ന ബക്കറ്റിൽ നിന്ന് 5000 രൂപ മോഷണം കവർന്നതായാണ് ജുമാ മസ്ജിദ് സെക്രട്ടറി ബാബു പി.സെയ്ദ് പൊലീസിൽ പരാതി നൽകിയിരിക്കുന്നത്. മാസ്‌ക് ധരിച്ച അപരിചിതൻ പള്ളിയിൽ പ്രവേശിക്കുന്നതും പണം സൂക്ഷിച്ചിരുന്ന ബക്കറ്റ് എടുത്തു കൊണ്ടു പോകുന്നതിന്റെയും സി.സി ടി.വി ദൃശ്യങ്ങൾ ലഭിച്ചിട്ടുണ്ട്. എന്നാൽ മുഖം വ്യക്തമല്ല. ചൊവ്വാഴ്ച രാവിലെ പത്തിനു ശേഷം അപരിചിതനായ ഒരാളെ പള്ളിയിൽ കണ്ടതിനെ തുടർന്ന് ചിലർ ഇയാളെ ചോദ്യം ചെയ്തിരുന്നു. എന്നാൽ ഇടുക്കി സ്വദേശിയാണെന്നും വീടുകളിൽ സാധനങ്ങൾ വിൽക്കുന്നയാളാണെന്നും മറുപടി നൽകി. പിന്നീട് നടത്തിയ പരിശോധനയിലാണ് പണം കാണാതായതായി വ്യക്തമായത്. സംഭവത്തിൽ കേസെടുത്ത് അന്വേഷണം ആരംഭിച്ചതായി എസ്‌.ഐ ബൈജു പി. ബാബു പറഞ്ഞു.