ചെറുതോണി: പെരിയാറ്റിൽ വിഷം കലർത്തി മീൻ പിടിക്കുന്നതായി ആരോപണം. വേനൽ കടുത്തതോടെ ജലക്ഷാമം രൂക്ഷമായിരിക്കുമ്പോഴാണ് പെരിയാറിൽ മത്സ്യബന്ധനത്തിന് വിഷം ഉപയോഗിക്കുന്നത്. വാഴത്തോപ്പ് പള്ളിക്കവല ഭാഗത്ത് പെരിയാറിലാണ് പുലർച്ചെ വിഷം കലർത്തിയതിനെത്തുടർന്ന് മലിനമായ നിലയിൽ നാട്ടുകാരുടെ ശ്രദ്ധയിൽ പെട്ടത്. ഈ ഭാഗത്ത് മത്സ്യബന്ധനത്തിനായി ചിലർ കഴിഞ്ഞ രാത്രിയിൽ വല കെട്ടിയിട്ടുണ്ട്. മത്സ്യങ്ങൾ വലയിൽ കുടുങ്ങുന്നതിനുവേണ്ടി നടത്തിയ ഇടപെടലാവാം വെള്ളം മലിനമായതെന്ന് നാട്ടുകാർ പറഞ്ഞു. ചെറുതോണി മുതൽ ആലുവ വരെ തീരപ്രദേശത്തുള്ള ആളുകൾ കുടിവെള്ളത്തിനായി ആശ്രയിക്കുന്നത് പെരിയാറിനെയാണ്.