തൊടുപുഴ: നഗരസഭയുടെയും കുടുംബശ്രീയുടെയും നേതൃത്വത്തിൽ ദേശീയ നഗര ഉപജീവന ദൗത്യത്തിന്റെ ഭാഗമായി തൊടുപുഴയിൽ ആരംഭിക്കുന്ന സൗജന്യ തൊഴിൽ പരിശീലന കോഴ്‌സിലേക്കുള്ള പ്രവേശനത്തിന് അപേക്ഷ ക്ഷണിച്ചു. ഫീൽഡ് ടെക്‌നിഷ്യൻ (ഹോം അപ്ലയൻസസ്) എന്നതാണ് കോഴ്‌സ്. മൂന്ന് മാസം ദൈർഘ്യമുള്ള ഈ കോഴ്‌സിലേക്കുള്ള പ്രവേശനവും തുടർപഠനവും തികച്ചും സൗജന്യമായിരിക്കും. അപേക്ഷകർ നഗരസഭാപരിധിയിലെ സ്ഥിരതാമസക്കാരും 18നും 35 നും ഇടയിൽ പ്രായമുള്ളവരുമായിരിക്കണം. വാർഷികവരുമാനം ഒരു ലക്ഷം രൂപയിൽ കവിയാത്ത കുടുംബങ്ങളിലെ അംഗങ്ങളായിരിക്കണം. എസ്.എസ്.എൽ.സിയാണ് കുറഞ്ഞ വിദ്യാഭ്യാസയോഗ്യത. നല്ല ജോലി സാധ്യതയുള്ളതും കോഴ്‌സ് കഴിഞ്ഞാൽ ഉടൻ തന്നെ ജോലി ഉറപ്പാക്കുന്നതുമായ കോഴ്‌സാണിത്. കോഴ്‌സ് വിജയകരമായി പൂർത്തിയാക്കുന്നവർക്ക് 2000 രൂപ ടി.എയും അതിന് ശേഷം മൂന്ന് മാസം ശമ്പളത്തോട് കൂടി ജോലി പൂർത്തിയാക്കിയാൽ 3000 രൂപ ധനസഹായവും ലഭിക്കും. വിവിധ കമ്പനികളിൽ ഉറപ്പായ പ്ലേസ്‌മെന്റ് സപ്പോർട്ടും ഉണ്ടായിരിക്കും. മങ്ങാട്ടുകവലയിലുള്ള ട്രോണിക്‌സ് ഐ.ടി.ഐയാണ് ഈ കോഴ്‌സ് നടത്തുന്നത്. താത്പര്യമുള്ള അപേക്ഷകർ ഫെബ്രുവരി രണ്ടിനുള്ളിൽ നഗരസഭയിൽ പേര് രജിസ്റ്റർ ചെയ്യണം. കൂടുതൽ വിവരങ്ങൾക്ക് നഗരസഭയിലെ എൻ.യു.എൽ.എം. വിഭാഗവുമായി ബന്ധപ്പെടുക. ഫോൺ: 8547931803, 8137925567.