കണ്ണൂർ: കൊച്ചി- മംഗളൂരു ഗെയിൽ പൈപ്പ് ലൈൻ പദ്ധതി യാഥാർത്ഥ്യമായതോടെ ഇനി അതിവേഗം പൂർത്തിയാക്കേണ്ടത് സിറ്റി ഗ്യാസ് പദ്ധതി. നിലവിൽ കമ്മിഷൻ ചെയ്ത ഗെയിൽ പൈപ്പ് ലൈനിലൂടെ വീടുകളി ൽ പാചക വാതകമെത്തിക്കാനുള്ള സിറ്റി ഗ്യാസ് വിതരണ പദ്ധതിയുടെ നിർമ്മാണം ഫെബ്രുവരിയിൽ തുടങ്ങാൻ കഴിയുമെന്ന പ്രതീക്ഷയിലാണ് അധികൃതർ. മാർച്ചിൽ കണക്ഷൻ നൽകാനാകുമെന്നാണ് പ്രതീക്ഷിക്കുന്നത്. ചക്കരക്കൽ– കൂടാളി റോഡിലുള്ളവർക്കാണ് ഇതിന്റെ പ്രയോജനം ലഭിക്കുക.
വീടുകളിലേക്കുള്ള കണക്ഷന് ഒരിഞ്ച്, അരയിഞ്ച് പോളിത്തീൻ പൈപ്പാണിടുന്നത്. ഇതിനൊപ്പം ചാലോട്– മേലെ ചൊവ്വ മെയിൻ പൈപ്പ് ലൈനിന്റെ പണിയും ആരംഭിക്കും.ജില്ലയിലെ 53 വില്ലേജുകളിലെ 82 കിലോമീറ്റർ പ്രദേശത്തിലൂടെയാണ് കൊച്ചി– മംഗളൂരു ഗെയിൽ മേജർ പൈപ്പ് ലൈൻ കടന്നുപോകുന്നത്.

ആദ്യഘട്ടം മൂന്നു പഞ്ചായത്തുകളിൽ

കൂടാളിയിലെ സിറ്റി ഗ്യാസ് സ്‌റ്റേഷന് സമീപമുള്ള വീട്ടുകാർക്കാണ് ആദ്യം കണക്ഷൻ നൽകുക. കൂടാളി, മുണ്ടേരി, അഞ്ചരക്കണ്ടി പഞ്ചായത്തുകളിലെ ഓരോ വാർഡുകളിൽ സിറ്റി ഗ്യാസ് ആദ്യം എത്തും. ഘട്ടംഘട്ടമായി തലശേരി– മാഹി മെയിൻ പൈപ്പ് ലൈനിന്റെയും തളിപ്പറമ്പിലേക്കുള്ള ലൈനിന്റെയും പണി തുടങ്ങും. ഇതിനുള്ള ടെൻഡർ നടപടി പുരോഗമിക്കുകയാണ്. വീടുകളിൽ ഗ്യാസ് എത്തിക്കുന്നതിനുള്ള സിറ്റി ഗ്യാസ് ഡിഡ്ട്രിബ്യൂഷൻ പദ്ധതി ഇന്ത്യൻ ഓയിൽ കോർപറേഷനും അദാനി ഗ്രൂപ്പുമാണ് ഏറ്റെടുത്തിട്ടുള്ളത്. പൈപ്പഡ് നാച്ചുറൽ ഗ്യാസിനു (പി.എൻ.ജി) പുറമെ മോട്ടോർ വാഹനങ്ങൾക്ക് കംപ്രസ്ഡ് നാച്ചുറൽ ഗ്യാസും (സി.എൻ.ജി) വിതരണംചെയ്യാൻ പദ്ധതിയുണ്ട്.

കണ്ണൂരിൽ ആറു സ്റ്റേഷനുകൾ
ബാവുപ്പറമ്പ് ഉൾപ്പെടെ ആറ് സ്‌റ്റേഷനുകളാണ് ജില്ലയിലുള്ളത്. കടവത്തൂർ, ഓലയിക്കര, കൂടാളി, അമ്മാനപ്പാറ, മാത്തിൽ എന്നിവയാണ് വാൾ സ്‌റ്റേഷനുകൾ. 16 കിലോമീറ്റർ ഇടവിട്ടാണ് വാൾ സ്‌റ്റേഷൻ. 100 കിലോമീറ്റർ പരിധിക്കുള്ളിൽ മേജർ സ്‌റ്റേഷനുണ്ടാകും.