കാഞ്ഞങ്ങാട്: സഹപാഠിക്ക് വീടൊരുക്കാൻ എളേരിത്തട്ട് ഇ.കെ നായനാർ സ്മാരക ഗവ. കോളേജിലെ പ്രഥമ പ്രീഡിഗ്രി ബാച്ചിലെ ക്ലാസ്‌മേറ്റ് വാട്സ് ആപ്പ് കൂട്ടായ്മ. 1981-83 ബാച്ചിലെ തേർഡ്, ഫോർത്ത് ഗ്രൂപ്പുകളിൽ പഠനം നടത്തിയവരാണ് ഹിന്ദിയിൽ മാസ്റ്റർ ബിരുദധാരിണിയായ കരുവഞ്ചാൽ വെള്ളാട്ടെ കെ.എസ് രമണിയ്ക്കായി വീടൊരുക്കുന്നത്. രമണി വിവാഹശേഷം ശ്രീകണ്ഠാപുരത്തിനടുത്തായിരുന്നു താമസം. 25 വയസുള്ള മൂത്തമകൻ ഒരു വാഹനാപകടത്തിൽ മരണപ്പെട്ടു. ഭർത്താവ് ശശി നിർമ്മാണ ജോലിക്കിടയിൽ കെട്ടിടത്തിൽ നിന്ന് വീണ് ഗുരുതരമായി പരിക്കേറ്റ് കിടപ്പിലായതോടെ ഇളയമകളുടെയും രമണിയുടെയും ജീവിതം ദുരിതപൂർണമാവുകയായിരുന്നു. ഉള്ളതെല്ലാം വിറ്റുപെറുക്കി കടബാദ്ധ്യതകൾ തീർത്ത് ഒരു വർഷം മുമ്പ് വെള്ളാട്ട് അഞ്ച് സെന്റ് സ്ഥലം വാങ്ങി പ്ലാസ്റ്റിക് ഷീറ്റ് വിരിച്ച ഷെഡിലാണ് താമസം. സഹപാഠികൾക്ക് കരുവഞ്ചാലിലെ പൊതുസമൂഹവും പിന്തുണ നൽകി . നിർമ്മാണ ജോലികൾക്ക് തുടക്കം കുറിച്ച ചടങ്ങിൽ പഞ്ചായത്ത് അംഗം പി. നിഷ, വി.കെ രാജൻ നായർ, അഡ്വ. സോണി കാരിക്കൽ, ഇ.വി രാജേന്ദ്രൻ, തോമസ് ജോസഫ്, ഇ.വി എബ്രഹാം, മാമച്ചൻ തോമസ്, ജീമോൻ കെ. ആൻഡ്രുസ്, ജോൺസൺ കാവാലം എന്നിവർ സംസാരിച്ചു. സുഭാഷ് എളേരി സ്വാഗതവും ടി.കെ നാരായണൻ നന്ദിയും പറഞ്ഞു.