കാവുംമന്ദം: വേദനയനുഭവിക്കുന്ന കിടപ്പ് രോഗികൾക്ക് തന്നാൽ കഴിയുന്ന സഹായങ്ങൾ ചെയ്യണമെന്ന ആഗ്രഹമാണ് സ്വന്തം ജീവിതമാർഗ്ഗമായ ഓട്ടോറിക്ഷയിൽ ഒരു സംഭാവന പെട്ടി സ്ഥാപിക്കാൻ കാവുംമന്ദം സ്വദേശിയായ ഡ്രൈവർ യൂസുഫലിയെ പ്രേരിപ്പിച്ചത്. സംഭാവനപ്പെട്ടിയിലൂടെ ലഭിച്ച ആദ്യ തുക പാലിയേറ്റീവ് കെയർ ദിനത്തിൽ തരിയോട് സെക്കൻഡറി പെയിൻ ആൻഡ് പാലിയേറ്റീവ് പ്രസിഡന്റ് ഷമീം പാറക്കണ്ടിക്ക് കൈമാറി. ഓട്ടോയാത്രക്കാരിൽ നിന്നു ലഭിക്കുന്ന നാണയത്തുട്ടുകൾ കൊണ്ട് പാലിയേറ്റീവ് രോഗികളെ സഹായിക്കുമ്പോൾ ലഭിക്കുന്ന സന്തോഷം വളരെ വലുതാണെന്ന് യൂസുഫലി പറയുന്നു. പാലിയേറ്റീവ് വളണ്ടിയർമാരായ ജിൻസി സണ്ണി, പി.കെ.മുസ്തഫ, ശാന്തി അനിൽ, ഫിസിയോതെറാപ്പിസ്റ്റ് സനൽരാജ്, ജൂലി ജോർജ്ജ് തുടങ്ങിയവർ സംബന്ധിച്ചു.