കൽപ്പറ്റ: കൽപ്പറ്റ എസ്.കെ.എം.ജെ. ഹൈസ്‌കൂൾ ഗ്രൗണ്ടിൽ ഇന്ന് നടക്കുന്ന റിപ്പബ്ലിക് ദിനാഘോഷ ചടങ്ങിലേക്ക് കൊവിഡ് പശ്ചാത്തലത്തിൽ പൊതുജനങ്ങളെ പ്രവേശിപ്പിക്കില്ല. അറുപത്തിയഞ്ച് വയസിൽ കൂടുതൽ പ്രായമുള്ള മുതിർന്ന പൗരന്മാരെയും പത്തുവയസ്സിൽ താഴെയുള്ള കുട്ടികളെയും ആഘോഷ പരിപാടികളിൽ നിന്ന് ഒഴിവാക്കി.

പരമാവധി 100 ക്ഷണിതാക്കളെ കൊവിഡ് മാനദണ്ഡങ്ങൾ പാലിച്ച് പ്രവേശിപ്പിക്കും. തെർമൽ പരിശോധന നടത്തിയും മാസ്‌ക്, സാനിറ്റൈസർ, സാമൂഹിക അകലം എന്നിവ ഉറപ്പാക്കിയാണ് പ്രവേശനം അനുവദിക്കുക. സാംസ്‌കാരിക പരിപാടികൾ ഉൾപ്പെടെയുളള ആഘോഷ പരിപാടികളും പരിമിതപ്പെടുത്തിയിട്ടുണ്ട്. മാർച്ച് പാസ്റ്റ്, സമ്മാനദാനം എന്നിവ പരേഡിനോട് അനുബന്ധിച്ച് ഉണ്ടാവില്ല.

രാവിലെ 8.40 മുതൽ നടക്കുന്ന ചടങ്ങിൽ വിശിഷ്ടാതിഥിയായ തുറമുഖം മ്യൂസിയം പുരാവസ്തു വകുപ്പ് മന്ത്രി രാമചന്ദ്രൻ കടന്നപ്പള്ളി സല്യൂട്ട് സ്വീകരിക്കും. തുടർന്ന് അദ്ദേഹം റിപ്പബ്ലിക് ദിന സന്ദേശം നൽകും. പൊലീസ് സേനാ വിഭാഗത്തിന്റെ 3 പ്ലാറ്റൂണുകൾ പങ്കെടുക്കും. ചടങ്ങിൽ എം.എൽ.എ.മാരായ സി.കെ.ശശീന്ദ്രൻ, ഒ.ആർകേളു, ഐ.സി. ബാലകൃഷ്ണൻ, ജില്ലാ പഞ്ചായത്ത് പ്രസിഡന്റ് ഷംസാദ് മരക്കാർ ,ജില്ലാ കളക്ടർ ഡോ.അദീല അബ്ദുള്ള, ജില്ലാ പൊലീസ് മേധാവി ജി.പൂങ്കുഴലി, വിവിധ ജനപ്രതിനിധികൾ, തുടങ്ങിയവർ പങ്കെടുക്കും.

വൈദ്യുതി മുടങ്ങും
പടിഞ്ഞാറത്തറ സെക്ഷനിലെ ചെന്നലോട്, വൈപ്പടി, മയിലാടുംകുന്ന്, കല്ലങ്കാരി, ലൂയീസ് മൗണ്ട്, പുഴയ്ക്കൽ ഭാഗങ്ങളിൽ ബുധനാഴ്ച്ച രാവിലെ 9 മുതൽ 5.30 വരെ പൂർണ്ണമായോ ഭാഗീകമായോ വൈദ്യുതി മുടങ്ങും.