പാലാ : എസ്.എൻ.ഡി.പി യോഗം മൂന്നിലവ് 5156-ാം ശാഖയിൽ ശ്രീനാരായണ ഗുരുദേവ പഞ്ചലോഹ വിഗ്രഹ പ്രതിഷ്ഠയും ക്ഷേത്ര സമർപ്പണവും 18ന് നടക്കും. ഇതിന് മുന്നോടിയായുള്ള പഞ്ചലോഹ വിഗ്രഹ ഘോഷയാത്ര ഇന്ന് വൈകിട്ട് 3ന് ഇടപ്പാടി ആനന്ദഷണ്മുഖ ക്ഷേത്ര സന്നിധിയിൽ നിന്നും ആരംഭിക്കുമെന്ന് ശാഖാ ഭാരവാഹികളായ കെ.പി രവീന്ദ്രൻ, എം.എസ് തങ്കച്ചൻ, എ.കെ വിനോദ് എന്നിവർ അറിയിച്ചു.
3.15ന് ഭരണങ്ങാനം കീഴമ്പാറ ശാഖയിലെ ഭക്തജനങ്ങളും 3.30ന് തെള്ളിയാമറ്റം അമ്പാറ ശാഖയിലെ ഭക്തജനങ്ങളും പഞ്ചലോഹ വിഗ്രഹ ഘോഷയാത്രയ്ക്ക് സ്വീകരണം നൽകും. 4.30ന് മൂന്നിലവ് ബാങ്ക് ജംഗ്ഷനിൽ നിന്നും ശാഖാ ഭാരവാഹികളുടെയും പോഷകസംഘടനകളുടെയും നേതൃത്വത്തിൽ വിഗ്രഹം വാദ്യമേളങ്ങളുടെ അകമ്പടിയോടെ ശാഖാ മന്ദിരത്തിലേക്ക് ആനയിക്കും. വൈകിട്ട് 6ന് ആചാര്യവരണം, 7ന് ഗുരുദേവ വിഗ്രഹത്തിന് സ്വീകരണം.
17ന് വിശേഷാൽ പൂജകൾ, രാവിലെ 6ന് ഗണപതിഹോമം, 18ന് രാവിലെ 6ന് മഹാഗണപതിഹോമം. 9 നും 9.45 നും മദ്ധ്യേ കുംഭം രാശി മുഹൂർത്തത്തിൽ സ്വാമി ധർമ്മചൈതന്യയുടെയും പൂഞ്ഞാർ ബാബു നാരായണൻ തന്ത്രിയുടെയും നേതൃത്വത്തിൽ ഗുരുദേവ പഞ്ചലോഹ വിഗ്രഹ പ്രതിഷ്ഠയും കലശാഭിഷേകങ്ങളും നടക്കും. 10.30ന് സ്വാമി ധർമ്മചൈതന്യ, പൂഞ്ഞാർ ബാബു നാരായണൻ തന്ത്രി എന്നിവർ അനുഗ്രഹ പ്രഭാഷണം നടത്തും. 11.30ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ ഓൺലൈൻ വഴി ക്ഷേത്രസമർപ്പണം നിർവഹിക്കും. മീനച്ചിൽ യൂണിയൻ നേതാക്കളായ എം.ബി ശ്രീകുമാർ, എം.പി സെൻ, ലാലിറ്റ് എസ്. തകടിയേൽ,എം.ആർ ഉല്ലാസ്, സി.റ്റി രാജൻ, അക്ഷര, കെ.ബി അരുൺകുമാർ കുളമ്പള്ളിൽ,വി.കെ. ഗിരീഷ് കുമാർ തുടങ്ങിയവർ സന്നിഹിതരായിരിക്കും.
12ന് സി.കെ. വാസുദേവൻ, കെ.പി രവീന്ദ്രൻ, ജോമി വലിയപറമ്പിൽ, റോബിൻ എൻ, അശോക് കുമാർ, രതീഷ് മുണ്ടയാനിയിൽ, ആനന്ദ് എം.അജി എന്നിവരെ ആദരിക്കും. 1ന് പ്രസാദവിതരണം, 1.15ന് മഹാപ്രസാദമൂട്ട്.