പാലാ : മാർ സ്ലീവാ മെഡിസിറ്റി പാലാ പുറത്തിറക്കുന്ന മെഡിക്കൽ റിസർച്ച് ജേർണൽ 'മാർ സ്ലീവാ ജേർണൽ ഒഫ് മെഡിസിൻ' പ്രകാശനം ചെയ്തു. പാലാ രൂപത ബിഷപ് മാർ ജോസഫ് കല്ലറങ്ങാട്ട് മെഡിക്കൽ ഡയറക്ടർ ഡോ. ലിസി തോമസിന് ആദ്യ കോപ്പി നൽകി പ്രകാശനം നിർവഹിച്ചു. മാർ സ്ലീവാ മെഡിസിറ്റി പാലായുടെ അക്കാഡമിക് വിഭാഗത്തിന്റെ കീഴിലാണ്, മെഡിക്കൽ റിസർച്ച് ജേർണൽ ആരംഭിച്ചത്. ആശുപത്രിയിൽ സേവനം ചെയ്തു വരുന്ന ഡോക്ടർമാരുടെ മെഡിക്കൽ ലേഖനങ്ങളുടെ സമാഹാരമാണ് ഒന്നാം പതിപ്പിൽ അടങ്ങിയിരിക്കുന്നത്. വർഷത്തിൽ രണ്ടു തവണ പുറത്തിറക്കാൻ പദ്ധതിയുള്ള ജേർണലിൽ വിവിധ സ്‌പെഷ്യാലിറ്റി, സൂപ്പർ സ്‌പെഷ്യാലിറ്റി വിഭാഗങ്ങളിൽ നിന്നുള്ള 30 ഓളം ലേഖനങ്ങളാണുള്ളത്. ആശുപത്രി മാനേജിംഗ് ഡയറക്ടർ മോൺ. എബ്രഹാം കൊല്ലിത്താനത്തുമലയിൽ, മെഡിക്കൽ ഡയറക്ടർ ഡോ. ലിസി തോമസ്, അക്കാഡമിക് ഡയറക്ടർ ഡോ. ജോസഫ് പര്യാത്ത്, മറ്റു ആശുപത്രി ഡയറക്ടർമാർ, ജേർണൽ എഡിറ്റോറിയൽ ബോർഡ് അംഗങ്ങളായ ഡോ. ജോയി മാണി, ഡോ.മഞ്ജുള രാമചന്ദ്രൻ, ഡോ. ജേക്കബ് ജോർജ് പി., ഡോ. സണ്ണി ജോൺ, ഡോ. ജിസ് തോമസ്, ഡോ. ഗീതു ആന്റണി എന്നിവർ ചടങ്ങിൽ പങ്കെടുത്തു.