പാലാ: കെ.എം മാണിയുടെ 88ാം ജന്മദിനത്തിൽ ഓർമ്മപുതുക്കിയും പ്രണാമം അർപ്പിച്ചും നിരവധി പേർ ഇന്നലെ പാലാ നഗരത്തിലെത്തി.
പാലാ മുനിസിപ്പൽ പാർക്കിലെ ഓപ്പൺസ്റ്റേജിൽ സജ്ജീകരിച്ചിരുന്ന കെ.എം. മാണിയുടെ പൂർണ്ണകായ ചിത്രത്തിനു മുന്നിൽ എല്ലാവരും പുഷ്പാഞ്ജലി അർപ്പിച്ചു. മാണിയുടെ 88ാം ജന്മവാർഷിക ദിനത്തോടനുബന്ധിച്ച് കെ.എം. മാണി ഫൗണ്ടേഷൻ സംസ്ഥാനമൊട്ടാകെ ആയിരം കേന്ദ്രങ്ങളിലായി 'ഹൃദയത്തിൽ മാണിസാർ' എന്ന പേരിൽ സംഘടിപ്പിച്ച സ്മൃതിസംഗമങ്ങളുടെ സമാപനത്തോടനുബന്ധിച്ച് പാലായിൽ സംഘടിപ്പിച്ച അനുസ്മരണ ചടങ്ങാണ് തലമുറകളുടെ കൂടിച്ചേരലിന് വേദിയായത്. മാണിയുടെ സ്‌നേഹസ്പർശം ഏറ്റവരും പൊതുപ്രവർത്തനത്തിൽ അദ്ദേഹത്തോടൊപ്പം പങ്കാളികളായവരും ഓർമ്മകൾ പങ്കുവച്ചു. സ്റ്റേജിൽ സ്ഥാപിച്ച വലിയ സ്‌ക്രീനിൽ മാണിയുടെ മുൻകാല പ്രസംഗങ്ങളും വിവിധ നേതാക്കളുടെ അനുസ്മരണങ്ങളും പ്രദർശിപ്പിച്ചുകൊണ്ടിരുന്നു. പ്രാർത്ഥനാഗീതങ്ങളാൽ മുഖരിതമായിരുന്നു വേദി.കൊവിഡ് മാനദണ്ഡങ്ങൾ പാലിച്ച് ആൾക്കൂട്ടം ഒഴിവാക്കി ക്ഷണിക്കപ്പെട്ട സദസിലായിരുന്നു അനുസ്മരണ ചടങ്ങുകൾ നടന്നത്. കെ.എം മാണിയുടെ മുൻകാല സഹപ്രവർത്തകരെ ചടങ്ങുകളിൽ ആദരിക്കുകയും ചെയ്തു.