ഇന്നത്തെ കാലത്ത് ഭൂത-പ്രേതാദികളിൽ വിശ്വസിക്കുന്നവർ വിരളമാണ്. എന്നാൽ, അത്തരക്കാർ തീർച്ചയായും പോയിരിക്കേണ്ട ഒരു കൊട്ടാരമുണ്ട് അങ്ങ് അയർലന്റിൽ. മെക്സ്‌ഫോഡിൽ പ്രസിദ്ധമായ ഹുക്ക്‌ പെനിൻസുലയ്‌ക്കടുത്താണ്‌ നൂറ്റാണ്ടുകൾ പഴക്കമുള്ള ലോഫ്‌റ്റസ്‌ ഹാൾ സ്ഥിതി ചെയ്യുന്നത്. കടലിനഭിമുഖമായി ഒറ്റപ്പെട്ട്‌ നിൽക്കുന്ന ചാരനിറത്തിലുള്ള മനോഹര സൗധം ഇന്നറിയപ്പെടുന്നത്‌ അയർലന്റിലെ ‘ഏറ്റവും ഭയപ്പെടുത്തുന്ന കെട്ടിടം’ എന്ന വിശേഷണത്തോടെയാണ്.
ആയിരത്തോളം വർഷങ്ങളുടെ പാരമ്പര്യമുള്ള ലോഫ്‌റ്റസ്‌ ഹാൾ, ഒരുകാലത്ത്‌ കെൽട്ടിക്‌ സംസ്കാരത്തിന്റെയും ഡ്രൂഡുകളുടെയും പരിശുദ്ധ ഭവനമായി കണക്കാക്കപ്പെട്ടിരുന്നു. പന്ത്രണ്ടാം നൂറ്റാണ്ടിൽ റെഡ്‌മണ്ട്‌ കുടുംബം ഏറ്റെടുത്തതിന്‌ ശേഷം റെഡ്‌മണ്ട്‌ ഹാൾ എന്നറിയപ്പെട്ടിരുന്ന കെട്ടിടം നിരവധി തവണ ക്രോംവെലിയൻ ആക്രമണങ്ങൾ നേരിട്ടിരുന്നു. പിന്നീട്‌ ഉടമ്പടികളോടെ കെട്ടിടം റെഡ്‌മണ്ട്‌ കുടുംബത്തിന്‌ തിരിച്ചുനൽകിയെങ്കിലും അവസാനത്തെ അവകാശിയായിരുന്ന അലക്സാണ്ടർ റെഡ്‌മണ്ടിന്റെ മരണശേഷം കെട്ടിടം ലേലം ചെയ്തു.
ഇംഗ്ളണ്ടിലെ യോക്ക്‌ഷയറിലെ ഹെൻട്രി ലോഫ്‌റ്റസ്‌ എന്ന പ്രഭു 1666-ൽ ലേലത്തിൽ വാങ്ങിക്കുകയും ലോഫ്‌റ്റസ്‌ ഹാൾ എന്ന്‌ പുനർനാമകരണം ചെയ്യുകയും ചെയ്തു. 1700കളിൽ ലോർഡ് ടോട്ടഹാം കുടുംബം ആയിരുന്നു ഇവിടെ കഴിഞ്ഞിരുന്നത്. ഒരിക്കൽ ഒരു മഴയുള്ള രാത്രിയിൽ ഈ കുടുംബത്തിന്റെ അതിഥിയായി ഒരു അജ്ഞാതൻ എത്തിയെന്നും അതിനു ശേഷം ടോട്ടഹാം കുടുംബത്തിലെ മൂത്ത മകളായ ആനിന് ഭ്രാന്തു പിടിച്ചെന്നും ആണ് പറയപ്പെടുന്നത്. ഇവിടുത്തെ ഒരു ഇരുട്ടറയിൽ പിന്നീടു വർഷങ്ങളോളം ആൻ തടങ്കലിലായിരുന്നു. അവരുടെ മരണശേഷം പലരും ഈ വീടിന്റെ പലയിടങ്ങളിലും ആനിന്റെ ആത്മാവിനെ കണ്ടിട്ടുണ്ട് എന്നാണ് പറയപ്പെടുന്നത്. ശേഷം ഒരു വൈദികൻ വന്നു ഇവിടെ പ്രേതബാധ ഒഴിപ്പിച്ചെന്നും പറയപ്പെടുന്നു.
എന്നാൽ, 1870കളിൽ വീട് പുതുക്കിപണിത ശേഷവും ഇവിടെ പഴയ നെഗറ്റീവ് എനർജി അനുഭവപ്പെടുന്നുണ്ട് എന്നാണ് അനുഭവസ്ഥരുടെ വെളിപ്പെടുത്തൽ. എന്നാൽ, പ്രേതബാധ ഉണ്ടെന്നു വിശ്വസിക്കപ്പെടുന്ന ഇവിടം അയർലന്റിലെ ഏറ്റവും വലിയ ടൂറിസ്റ്റ് സ്‌പോട്ട് കൂടിയാണ്. 63 എക്കറിൽ 27,124 ചതുരശ്രയടിയിലാണ് ഈ വീട് പടർന്നു കിടക്കുന്നത്. 2011ൽ അയിഡൻ ക്വിഗ്ലെ എന്ന ആളാണ് ഈ വീട് അവസാനമായി വാങ്ങിയത്. തുടർന്ന് ഇവിടം പ്രേതബാധയുള്ള ടൂറിസ്റ്റ് സ്‌പോട്ടായി സന്ദർശകർക്ക് തുറന്നു കൊടുത്തു. പ്രതിവർഷം 2,94,000 മില്യൻ ഡോളർ വരുമാനമാണ് ഈ ബംഗ്ളാവിൽ നിന്ന് ലഭിക്കുന്നത് എന്നാണ് കണക്കുകൾ വ്യക്തമാക്കുന്നത്.